Bandièra01 1180x150: Comuna de Tolosa

editorial

Resocializar l’occitan per mejan del cinèma: una granda avançada

Resocializar l’occitan per mejan del cinèma: una granda avançada
Resocializar l’occitan per mejan del cinèma: una granda avançada | "Lo mesprètz" de Jean-Luc Godard (1963)

Raportàvem dissabte sus las paginas de Jornalet, la granda jornada de cinèma en occitan que se tendrà a Peireguers divendres venent, 6 d’octòbre. Dins una sala de cinèma notabla e digna se projectarà la version en occitan del filme Cirano de Brageirac, del realizaire Jean-Paul Rappeneau. Aquesta iniciativa de Novelum, la seccion peiregòrda de l’IEO, representa una avançada significativa per promòure e reviudar l’occitan, donar de vam a l’indústria audiovisuala en lenga nòstra e encoratjar los escolans a emplegar la lenga delà las parets de l’escòla.

Lo matin d’aquel meteis jorn, los escolans occitanistas auràn l’escasença d’assistir a diferentas projeccions de cinèma en occitan. Las classas de mairala gaudiràn del filme d’animacion La Balena e l’Escaragòla, del temps que los cicles 2 e 3 agacharàn Lo Jorn de las Gralhas. A mai, los joves collegians liceans assistiràn a una sesilha de doblatge organizada per la còla de Conta’m e puèi se congostaràn de la projeccion del longmetratge Letra a Momò.

Los braves organizaires d’aquel brave eveniment an collaborat amb una associacion locala de cinefils d’art e d’ensag e amb Conta’m, per obténer una experiéncia cinematografica completa en occitan. La preséncia de personalitats coma Laurenç Labadie,[1] director artistic de Conta’m, apond una valor especiala a las projeccions e ofrís l’oportunitat de debatre de l’importància de la produccion cinematografica e del doblatge en occitan.

La produccion e lo doblatge de filmes en occitan an un ròtle crucial en las reafirmacion e reconeissença sociala de l’occitan. A mai de normalizar e de dignificar la lenga, es essencial de prepausar als escolans occitanistas e a la comunautat en general d’espacis e d’escasenças per far viure la lenga fòra de las salas d’escòla. Aital, aquela iniciativa non es pas solament un eveniment cultural, mas tanben un exemple inspiraire de seguir.

Se vos trobatz en Peiregòrd aqueste 6 d’octòbre, maquetz pas aquela escasença unica de vos congostar del cinèma en occitan dins una magnifica sala. E se sètz mai luènh, vos encoratjam a establir de contactes amb l’indústria audiovisuala en occitan e a organizar de sesilhas de cinèma en occitan pels escolans e pel public en general. D’un caire, collaboraretz activament a manténer viva lenga nòstra, tan mespresada per las classas dirigentas. A mai, la faretz viure amb dignitat dins cada recanton d’Occitània.

 

[1] Deman, publicarem un bèl article sus la primièra a Tolosa de son filme Eròs e Tanatòs, o psicoanalisi d’un artista occitan.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Zozime
1.

Es una bona causa d’ensatjar de tornar socializar l’occitan totis los mejans son bons, los occitanistas son aqui endavant per butar a la ròda e far prodèl, amai se son plan sovent carralas las ròdas.
Pasmens nos mena cap a una autra question : De cal se vòl socializar amb’un occitanista ?

  • 2
  • 0

Escriu un comentari sus aqueste article