Bandièra01 1180x150: País Invisible

editorial

Lo Torn de França passa per Occitània

Lo 30 de junh passat comencèt lo Torn de França, una de las competicions esportivas mai importantas del mond, amb de milions de seguidors per tota la planeta. Dins un encastre esportiu de mai en mai saturat de tecnologia, de motocicletas e de veituras de corsa, lo Torn de França manten viva la siá esséncia constitutiva e constituís uèi una vertadièra espròva esportiva, ont lo ciclista compta solament amb lo sieu esfòrç e la siá intelligéncia per s’i afrontar, exactament coma se fasiá en 1903 quand se’n faguèt la primièra edicion.
 
Divendres passat, lo 13 de julhet, lo Torn de França intrèt en tèrras occitanas. O faguèt pel Naut Vivarés. A partir d’alavetz, e fins al 20 de julhet, la corsa crosa un bon tròç d’Occitània: dissabte 14 passa per Tricastin fins al Cap d’Agde, dimenge 15 de julhet va de Limós (Rasés) a Fois (País de Fois), diluns 16 de Samatan (Savés) a Pau (Bearn), dimècres 18 de julhet de Pau (Bearn) a Banhèras de Luishon (Comenge), dijòus 17 de julhet de Banhèras de Luishon a Pèiraguda (Vath d’Aura), divendres 20 de julhet va de Blanhac (Tolosan) a Briva (País de Briva) e l’endeman sortisson ja del país per acabar dimenge a París.
 
Aquel trajècte met a la posita dels occitans una optima escasença per donar de visibilitat al nòstre país dins l’encastre d’una competicion que s’emet en dirècte per las televisions del Mond entièr. Es un bon moment per mostrar, a tota la planeta, que lo Torn de França es tanben, en part, lo Torn d’Occitània. Es per aquò que seriá positiu que los occitans aprofechèssem l’escasença per brandar de drapèls occitans al bòrd de las estradas ont passarà la corsa e per demostrar que lo país es viu, e tanben seriá bon de pintar sus l’asfalte de messatges als ciclistas per lor donar la benvenguda en Occitània. Un pòble qu’es pas visible als uèlhs dels autres es un pòble qu’existís pas.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

TristanGahús
2.

E ieu que pensèri totjorn que se trachava d'un torn dels Pirenèus amb de vertadièrs brigalhs de Belgica dedins, istòria que los esprintaires foguèsson pas tròp a la pena...

  • 1
  • 0

Escriu un comentari sus aqueste article