Bandièra01 1180x150: Comuna de Tolosa

editorial

La region es la region, la nacion es la nacion, e nosautres sèm nosautres

La còla de Jornalet sèm de raportaires, non pas d’administrators del país. Las regions administrativas nos concernisson pas gaire, sustot pr’amor qu’avèm una idèa clara del país e de sa division regionala, e mai n’avèm prepausat de mapas. Ça que la, avèm seguit amb grand interès tot lo procès de causida d’un nom per la region centrala, fruch de la fusion de Lengadòc-Rosselhon e Miègjorn-Pirenèus, fins a aquesta setmana, ont avèm aprés, amb un sentiment doç-amar, que lo Conselh d’Estat francés a validat lo nom d’“Occitània”.
 
D’un costat, celebram que l’estat francés aja respectat la volontat de la region concernida e volèm esperar que l’occitanisme ne pòsca tirar quicòm de positiu. De l’autre, planhèm que se tenga pas brica en compte las revendicacions dels catalans e, sustot, avèm lagui de la fòrta crisi qu’es arribada dins l’occitanisme. N’avèm parlat amb los legeires e qualques unes an respondut a un pichon questionari que publiquèrem lo jorn que fasiam una crida a la reconciliacion nacionala.
 
Las opinions que son arribadas a la redaccion son fòrça interessantas e ne podèm extraire las conclusions seguentas:
 
— Los partisans del nom d’Occitània per la region creson qu’es una bona estrategia per tot l’ensems del país, pas solament de la region.
 
— Los que son contraris son fòrça en colèra, e lors rasons son seriosas.
 
— Lo depaus del nom d’Occitània a l’INPI es lo planh mai mençonat.
 
— L’apondon d’un qualificatiu al nom de la region es la solucion mai demandada.
 
— Cal entamenar una accion generala e ambiciosa d’informacion sus Occitània e l’occitan.
 
— Cal trabalhar per que las autras regions occitanas (çò es Nòva Aqutània, Provença-Alps-Còsta d’Azur, Auvèrnhe-Ròse-Alps e Centre-Val de Léger) revendiquen lor occitanitat.
 
— Cal que la nòva region nomenada Occitània s’engatge amb las autras regions occitanas a respècte de la lenga, de la cultura e de l’identitat.
 
— La solucion mai prepausada es una manifestacion per l’occitan a Marselha.
 
E ben, se nos metèm al trabalh? L’umanitat serà pas la meteissa sens la nòstra contribucion a la diversitat, e sens la nòstra vision occitana del Mond.
 
Sembla que qualques unes se son meses al trabalh, e son pas precisament los occitanistas! 
 

 
 
 
 
 
 
NB. En çò que tanh a Jornalet, contunharem d’emplegar lo mot “Occitània” per mençonar tot lo país, de Bordèu a las Valadas e d’Aran a Vichèi. Quand caldrà emplegar aquel tèrme per rapòrt a la region o especificarem.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Andrieu
26.

Interessant de notar que los mèdia que generalament dison e escrivon : la région PACA,, Nouvelle Aquitaiene, etc. començan a dire e a escriure non pas : le région Occitanie mas l'Occitanie ; asard o tendéncia que poiriá venir fòrta ?
En vesent la mapa çai-sus, poiriá èsser una bon idèa de metre amb la rason sociala d'associacions, d'individús, etc. aquesta mapa per plan mostrar lo "hold-up" fach sustot que mot es depausat (!) e significar clarament que Occitània / Occitanie Pòt pas èsser redusit a la part congrua

  • 4
  • 0
Matiàs Karkash
25.

#23
Ai ai ai, bòn.
A ieu m'agrada de faire de "rasonaments" (aquò's mème mon mestièr, pecaire!)
Reconóisse agure passat l'òsca en tractar de "tolosanista" la massa gigantassa d'occitans qu'an votat per Occitanie PM. Èra mai que mai una provocacion inutila. Perdon.
Aime Tolosa de tot mon còr.
Espère que Tolosa, los tolosans, los occitanistas tolosans, lo monde participaràn a las campanhas politicas avenidoiras per defendre "l'occitanitat" de las autras regions occitanas.

Quand i serèm ne parlarem tornar.



  • 7
  • 1
Lo Muòl
24.

#22 paure gatet vai.....

  • 1
  • 17
Julian Tolosa
23.

#20

Se seguissèm lo vòstre ''rasonament'', cal creire que 100 000 personas (totas de Tolosa !) votèron pel nom Occitània pendent la consultacion ciutadana ?
Fasètz de generalitats a prepaus de l'occitanisme tolzan, es insuportable que se pòt pas. Balhatz tanben tròp d'importància a las gents de Convergéncia Occitana que serián tan poderosas qu'aurián capitat de fa votar 100 000 personas pel nom Occitània. E ben mon dieu ...

  • 13
  • 17
MC M
22.

#21 Cresi pas qu'apondre l'insulta a la leiçon de morala siegue fòrça productiu.

Aquò dich, un muòu deu èstre pron expèrt en question de saumassas.

  • 25
  • 6

Escriu un comentari sus aqueste article