Bandièra01 1180x150: Comuna de Tolosa

editorial

25 ans de la Tor deu Borrèu

Concèrt d'Alidé Sans a La Tor deu Borrèu
Concèrt d'Alidé Sans a La Tor deu Borrèu
La Tor deu Borrèu festeja ongan son 25n anniversari e la còla de Jornalet los volèm felicitar. S’agís pas solament d’un bar mas d’un local social e politic del quartièr del Hedars, al centre de Pau, que s’es consolidat long d’aquestas 25 annadas coma un endrech de referéncia. Aquí los joves i an trobat un luòc de luchas socialas e politicas, e tanben un endrech ont se pòt parlar la lenga e ont la cultura del país a una plaça per s'exibir sens cap de complèxe, ont de joves e de vielhs pòdon trencar amb la solesa de cada jorn per tornar trobar lo gaug de partejar un veire, una musica o una experiéncia.
 
A l’ora que los movements associatius riscan de se trobar anestesiats per una dependéncia excessiva de las subvencions publicas, lo cas de La Tor deu Borrèu es paradigmatic. S’agís d’una iniciativa nascuda de la basa del pòble que l’a tenguda pendent 25 ans, de còps en de situacions plan perilhosas e en s’afrontant a las menaças de barrament de cèrts conselhs municipals.
 
En mai d’aquò, i a un element caracteristic de la Tor deu Borrèu: la joinesa de lors promotors e de lors clients. Aquò es una pròva de la vitalitat occitana e de son avenir encoratjant. Es necite que d'autres joves d’autres endreches promògan lors locals e estanquets; e es necite que los mai grands lor balhem de sosten e de vam per o far.
 
A l’ora d’ara foncionan en Occitània d’autres centres de léser consagrats a la lenga, la cultura e lo país, coma l’Ostau dau País Marselhés dins la Ciutat Focèa o l’Estancabra de Tolosa, e tant d’autres. E caldriá que n’i aguèsse encara d’autres. Un bon ret d’estanquets per tot lo país teisseriá un bon malhum que nos ajudariá a viure amb un pauc mai de normalitat.
 
Per aquela rason, amb aqueste editorial, volèm saludar totes los bars e locals socials d’Occitània tota, ont se pòt discutir dins una vision occitana del Mond, ont se pòt quitament practicar la lenga e ont la cultura del país a una plaça per s'exibir sens cap de complèxe. E volèm sustot felicitar la còla de La Tor deu Borrèu, que dempuèi 25 ans resistís e marca totjorn lo camin de seguir. Que la Tor siá totjorn!




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Donacian Auvèrnhe
1.

Me fai jaug de veire d'endreits coma aquò... Bon anniversari ! Ne'n voliá mai profeitar per felicitar l'equipa de l'associacion «Arri Lemosin» que se demenan fèrme per socializar la linga dinc la charrèiras d'ès Lemòtges... Gramací !

  • 3
  • 0

Escriu un comentari sus aqueste article