Bandièra01 capçalera  1180x150: Novestivada

Actualitats

crotz-tolosaCreated with Sketch.Valadas Occitanas

L’esfondrament del pont Morandi met en question las infrastructuras e los bastiments d’Itàlia tota

La majoritat dels problèmas venon dels ans 1960, quand se bastiguèron de ponts, d’estradas, d’edificis e d’escòlas, tròp sovent amb l’intervencion de la màfia

| Salvatore1991
La catastròfa que l’a patida Gènoa a mes en question la seguretat de totas las infrastucturas de las Valadas, de la Gàrdia e de tot l’estat italian. Segon l’institut de las estatisticas d’Itàlia, i a mai de dos milions d’ostals instables dins tot l’estat, çò rapòrta The Guardian. Lo jornal britanic precisa que dins los darrièrs cinc ans serián tombats los teches de 156 escòlas. Lo pont Morandi de Gènoa èra considerat coma una belòia de l’engenhariá quand s’inaugurèt en 1967. Dempuèi 2004 es lo dotzen pont que s’esfondra. E mai, dins las darrièras cinc annadas son tombats cinc ponts.
 
La majoritat dels problèmas de las infrastructuras italianas venon dels ans 1960, amb lo plen espandiment de la construccion, quand se bastiguèron de ponts, d’estradas, de d’edificis e d’escòlas, tròp sovent amb l’intervencion de la màfia que se servissiá de materials de bon mercat e de marrida qualitat per maximizar lo profièch economic.
 
“I a pas cap de dobte que lo boom de la construccion dels ans 1960 contribuiguèt a exacerbar la situacion”, çò afirma Maurizio Carta, professor de planificacion urbana de l’Universitat de Palèrme. “Se bastiguèt fòrça a aquela epòca e pas totjorn amb las  nòrmas que caliá”, çò apond en tot precisar que s’es bastit sus “d’airals fragils, suls lièches dels rius, sus de zònas expausadas als resquilhaments del terren, sus de bauces e dins d’airals de naut risc idrogeologic e sismic...”. Carta afirma quitament que i a de mond qu’anèron demorar dins d’airals ont “per començar, i aurián pas degut demorar”.
 
 
Lo Sud mai que mai en perilh
 
Es dins lo sud d’Itàlia que las estradas e las bastissas corron mai de risques segon los expèrts. Es pas una coïncidéncia. Es justament aquí que las societats de construccion trabalhèron en connivéncia amb la màfia, en emplegant de materials de construccion amb pauc de betum e una quantitat desproporcionada de sable e d’aiga, per aver mai de profièch economic.
 
Quatre dels dotze ponts tombats dins las darrièras annadas èran en Sicília e dos son objècte d’una enquèsta per aver fach servir de betum de marrida qualitat. En Calàbria s’estúdian de desenas de ponts e de tunèls per aquela rason.
 
“En analisant lo nuclèu e las mòstras dels tunèls e dels ponts, ai trobat de blòcs de betum que lor resisténcia es tres còps inferiora a la nòrma”, çò diguèt a The Guardian lo procuraire antimàfia Catanzaro, Nicola Gratteri. “Foguèron de trabalhs publics realizats per la ‘Ndrangheta. Aicí en Calàbria la màfia contraròtla lo sector de la construccion dempuèi los ans 1960 e contraròtla uèi tot l’afar del betum. Après lo trafec de las drògas, la construccion es la segonda activitat mai rendabla per la ‘Ndrangheta”.
 
 
Lo saquejament de Palèrme
 
Vito Ciancimino, cap mafiós del clan Corleonesi, venguèt responsable dels trabalhs publics de Palèrme en 1959, e ordenèt la demolicion de bèls e polits ostals del sègle XIX en los remplaçant per de bastiments de betum de bon mercat. Aquel periòde istoric es conegut coma lo “saquejament de Palèrme“.
 
 
Pas solament la màfia
 
Ça que la, lo pont que s’esfondrèt a Lecco en octòbre de 2016, en provocant la mòrt d’un òme, èra pas bastit amb de betum de marrida qualitat e la màfia aviá pas res a veire amb sa bastison. Se passèt quicòm de parièr amb l’edificacion del pont de Fossanto, tombat en abril de 2017.
 
 
De las cinc parts una de las abitacions e 300 ponts en perilh
 
Un estudi comandat per l’associacion dels comerçants e dels artisans italians Confartigianato demòstra qu’un cinquen de las demoranças italianas son en marridas condicions o riscan de s’abausonar del meteis biais que s’esfonfrèt un immòble d’arpartaments a Torre Annunziata, près de Nàpols, en provocant la mòrt d’uèch personas lo 7 de julhet de 2017.
 
Quant als ponts, son aperaquí 300 se poirián abausonar en Itàlia. Totes requerisson fòrça argent per lor mantenença. Quitament qualques unes poiràn pas jamai resòlver lors problèmas estructurals. Per exemple, lo pont Morandi èra analisat dempuèi longtemps per una tièra de trabalhs de mantenença.
 
Segon lo Conselh Nacional de las Recèrcas, qu’es l’organisme public de la recèrca scientifica e tecnologica italian, una part enòrma de las infrastucturas italianas bastidas dins los ans 1950 e 1960 corron lo risc de s’engrunar. Tota una paradòxa al dels aquaductes, de las grandas bastissas romanas e de las glèisas de mai de 1000 ans.


 
Mai d’informacion sus The Guardian: Italy’s crumbling infrastructure under scrutiny after bridge collapse
 
 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Un gelato al limon
1.

E lo govèrn Lega-Cinque Stelle que nos avia persuadat que los dos perilhs màgers per Itàlia èran los imigrats-envasèires e Brussèlas-la-ladra ! Soi deçauput...

  • 18
  • 2

Escriu un comentari sus aqueste article