Bandièra01 capçalera  1180x150: Botiga

Actualitats

Accident d’un avion militar argerian en Aubrac

L’aparelh portava sièis passatgièrs. Los còrses son estats trobats

| © Google maps

Un avion de transpòrt militar argerian, que dedins i viatjavan sièis personas, cinc militars e un representant de la Banca d’Argeria, e que veniá de París per tornar en Argeria, s’esclafèt divendres, pauc abans 16 oras, en Aubrac, dins una airal despoblat près del vilatge de Trelans.


L’avion de transpòrt, de talha mejana, èra encara en flamas cap a 18h30, çò qu’entrepachèt l’intervencion dels pompièrs prèstes suls luòcs. Los sièis còrses foguèron trobats pel enquestaires.
 
L’aparelh transportava tanben de papièr fiduciari que servís a la fabricacion de bilhets de banca.
 
L’avion, un bimotor de tipe CASA segon la gendarmariá, s’esclafèt pr’amor d’un temps brumós, cap a 15h45, dins una zòna qu’es aperaquí a 1000 mètres de nautor.
 
L’accident se produsiguèt dins un camp près del vilatge de Trelans, segon lo cònsol d’aquela pichona comuna, en una region fòrça despoblada.
 
Segon la prefectura de Losera, ont una cellula de crisi foguèt mesa en marcha, 14 veïculs de pompièrs del departament intervenián amb 25 pompièrs, e sièis veïculs del departamemt d’Avairon amb 25 pompièrs; l’accident se debanèt al limit dels dos departaments.
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article