Bandièra01 1180x150: País Invisible

Actualitats

crotz-tolosaCreated with Sketch.GasconhaArmanhac

Armanhac: la Banca Alimentària que s’aprèsta, mei que mei

L’operacion de grana collècta annala se tendrà aquesta fin de setmana, es a díser divés e dissabte

| Banque Alimentaire du Gers
La Banca Alimentària qu’avia ua navèra campanha de collècta. Que serà aqueste divés e tanben dissabte, drin pertot en França. Qu’arrecapta vitalha de tot òrdi per las associacions caritativas. Qu’espèran augan n’amassar 11 000 tonas, sia 23 milions de repaish, en esperant que los blocatges deus Gilets Jaunes ne hàcian pas puishèu...aus gilets iranges.
 
Dens lo departament de Gèrs, en 2 jorns, 500 benevòls an per objectiu de collectar 40 tonas de produits alimentaris; çò que representa mei de 20% de las vitalhas annalas per la Banca Alimentària en Gèrs.
 
L’operacion de grana collècta anuala se tendrà aquesta fin de setmana, es a díser divés e dissabte. Es un temps hòrt que permet a l’associacion d’aufrir una ajuda alimentària a las personas en situacion de precaritat. L’objectiu es d’amassar de produits imperibles e tanben vitalhas secas que se consèrvan plan ende completar los dons de produits frescs venguts cada jorn de las ajudas regionalas e europèas, de las enterpresas o encara deus agricultors. Per la Banca Alimentària, çò que hè mestièr son sustot las consèrvas de carn de peish e de legums, mes tanben l’òli, lo sucre o encara la harina.
 
Enguan, los liceans del país son regde mobilizats. Seràn environ 120 a arcuélher los dons davant un cinquantenat de grans magazins situats en particular a Aush (País d'Aush), Masseuva (Astarac), Leitora (Lomanha), l’Isla de Baish (Savés), Riscla (Arribèra Baisha) e Miranda (Astarac).
 
Aquesta mobilizacion es un acte ciutadan peus que s’i son investits. E la grana navetat de 2018 veng de la banca deu Crèdit Agricòla Pirenèus Gasconha que hica a disposicion los sons salariats volontaris pendent mieja jornada ende júnher los benevòls de la Banca Alimentària. Los benevòls seràn doncas posicionats a la sortida deus magazins vestits d’un gilet irange e prepausaràn de pòchas aus consumaires. Pierre Buffo, president de la Banca Alimentària de Gèrs, demanda de reservar aus benevòls un arcuelh deus beròis e torna brembar que la collècta es en progression cada an, e saluda l’acte de generositat hèit peus qu’i participan.
 
 
 
 
Emilia Castanhèr
Ràdio País
 
 
 

Aqueste article es possible gràcias a un acòrdi de cooperacion entre Jornalet e Ràdio País.
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article