Bandièra01 1180x150: Comuna de Tolosa

Actualitats

Lo govèrn francés “pensa pas” que se pòsca crear una division administrativa pel Bascoat Nòrd

| Benoit Nadaud

La ministra Lebranchu s’es desdicha de la siá promessa e a anonciat que la demanda basca serà pas dins la reforma descentralizaira de l’Estat francés. Lo ministre de l’Interior, Manuel Valls, fixèt la posicion de París lo mes passat en dire que pas jamai i auriá un Bascoat reconegut en França tant qu’ETA liure pas las armas.


S’es escampat d’aiga freja suls partisans d’una collectivitat territoriala al Bascoat Nòrd. La ministra per la Reforma de l’Estat del govèrn francés, Marylise Lebranchu, a dich que “pensa pas” que siá possibla la creacion d’una unitat administrativa pels territòris bascos de la Republica Francesa. Lebranchu, segon lo jornal numeric Kazeta.info, considèra que la demanda basca aurà pas de plaça dins de la lei de descentralizacion que lo govèrn francés a previst de presentar al començament de l’an que ven.
 
Las paraulas de la ministra corrobòran aquelas del ministre de l’Interior francés, Manuel Valls, qu’a la fin del mes passat declarava, dins lo jornal espanhòl El País, que “i aur[iá] pas cap de Bascoat francés dins la lei de descentralizacion” perque París “vòl pas dobrir aquel debat”; e disiá coma pretèxt qu’ETA aviá pas encara liuradas las armas.
 
Mas aquela posicion contrasta amb la promessa qu’aviá fach Lebranchu abans que Valls intervenguèsse dins l’afar. A la mitat d’octòbre, la ministra assegurava que i auriá qualque tipe de reconeissença del Bascoat dins França. Lo quotidian Sud Ouest a interpretat que l’influéncia de Lebranchu es “en casuda liura” dins lo govèrn francés e que, sus aquel tèma, es Valls que marca l’agenda.
 
La demanda per una collectivitat basca a lo sosten del Conselh dels Representants del Bascoat (CRPB), que presentèt l’idèa als Estats Generals de la Democracia Territoriala (amassada dels representants locals organizada pel Senat) en setembre passat.
 
 
 
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Domergue Sumien Ais de Provença
20.

Per un estat occitan liure, inclusent lo Bas Ador, ont l'occitan serà la primiera lenga. Lei movements nacionalistas occitans an totjorn revendicat lo Bas Ador e an jamai abandonat aquela tèrra de Gasconha. Es la posicion d'Iniciativa per Occitània e dau PNO. Es la posicion que desvolopèri dins Jornalet lo 14.5.2012: http://opinion.jornalet.com/55

Un departament basco, òc. Un Bascoat independent, òc. Mai sens lo Bas Ador, qu'es gascon e occitan.

  • 1
  • 0
Faidit Comuns
19.

#15

"en aténder lo ton estat occitan independent, poderós, unilingüe, lo bonur tà tots...
Qu'espèri que serà ua monarquia e que'ns seràs tu lo rei : atau qu'èm sauvats !"

Ai dit aquò ieu ?
Ont ?
Quora ?

Pensi que una fantasma vòstra....


PS: Nos tutejam ? Avèm chucat la meteissa popa ?

  • 1
  • 2
Pèir Bigòrra
18.

#17 Eth problèma atieu ei que n'ei pas en pormor deths gascons qu'eth estat francés arrefusa un còp mes era creacion d'un departament basco. N'at an quitament pas avançat un còp eth argument aqueste, e que pensi qu'eths parlamentaris francés an desbrembat era vòsta arrequista e era vòsta quita existéncia dempuish bèra pòsa tau coma un sarròt d'occitanistas d'alhurs.

Mès tanben, malurosament, eth occitanisme o eth gasconisme deth Baish Ador n'ei pas james estat pro hòrt tà's hèr enténer e bastir causas durablas e impausar-se d'ua cèrta faiçon ath moviment basco incotestablament plan mes viu. Çò que hè que quin se senteishen eths abitans d'aqueth parçan adara, e eths joens sustot atieu. E's van díser mes gascons o bascos ? Que cranhi qu'era loa arresponsa e sié en contradicion dab un bon tròç dera istòria culturau d'aqueth petit territòri deths estrems mès dilhèu que m'engani. O dilhèu tanben que'us cau assumir d'èster "sharnegos" a tots, que non pas aver a causir ua capèra tà pelejar-se mélhor en combat que non serviré ne aths a uns ne aths autes. Mès de tota faiçon, n'ei pas a un bigordan d'at díser.

  • 0
  • 0
pierre arricoulet Baiona
17.

#16
Ah totun, que trobi iva coèrencia dens lo rasonament de certs !
La flaquesa qu'es vrai es evidenta mes a còps lo Baish Ador, ce sembla qu'es lo Yalta deus territòris minorizats. Se Occitània que vòu existir un jorn, deu compréner que la soa afirmacion ne deu pas estar sonque en quauques punts centralisats com Tolosa, Montpelhèr o Marselha mes autan plan deu costat de Niça com a Baiona. Despuish las annadas 1850 passadas qu'i a avut iva demanda de tiéner en compte deus gascons a l'assemblea nacionau suu problèma baionés.Qui ac sap ? Cap occitanista pensi. Baiona qu'es un simbèu e es mes mediatizat que non pas las granas ciutats d'òc peu combat de la diversitat.Alavetz perqué deishar aqueth territòri de costat ! Justament los occitanistas poderén har carrar los gascons que arcastan causas que ne hèn pas partida de la mesma cultura e mesma lenga ! Aquò es estrategia ! Senon, credi que los gascons ...còsta mes solament còsta aus occitans damoraràn !

  • 3
  • 0
garric
16.

#13 Òc, un moviment nacional occitan a pas cap de sens sens la solidaritat ambe los Occitans del Baish Ador... S'agís pas de renegar los dreches dels Bascos, mès de garantir los dels Occitans. Un departament basc aurà pas cap de politic de cap a l'Occitan, e quitament perseguirà lor assimilacion dins l'amira de bastir l'estat nacional. Serà pas mièlhs que la politica francesa. Cal una estructura administrativa mai federativa. Comprèni pas perqué d'unes que se dison Nacionalistas Occitans o lo quite Partit Occitan son aital prèstes a fòrabandir lo Baish Ador de l'Occitània a espelir ... Benlèu qu'es una marca de flaquesa.

  • 2
  • 0

Escriu un comentari sus aqueste article