Bandièra01 capçalera  1180x150: Novestivada

Actualitats

48 000 èuros tà la lenga nosta

Ligams que convidè a la premsa entà assistir a la remesa deus chècs a las associacions dont los projèctes estón arretienuts arron La Passem 2018

Diluns passat, 11 de març de 2019, l’associacion Ligams que convidè a la premsa entà assistir a la remesa deus chècs a las associacions dont los projèctes estón arretienuts arron La Passem 2018 qui permetó de crubar 48 000 èuros.

 

Qu’estó a l’InÒc Aquitània, au castèth d’Este de Vilhèra, que’s tienó aquera ceremònia.

 

7 projèctes qu’estón lavetz arretienuts peu comitat de seleccion suu vintenat de recebuts, aquiu que n’avetz ua presentacion:

 

— 2000 èuros entà la creacion peus Chancaires de Sent Pè de Lèren de panèus ludics e educatius a l’entorn deu parc d’aprentissatge de las chancas.

— 2500 èuros entau libe-CD taus mainats Lotrindeladança de la Companhia Crestian Josuèr, portat peus Menestrèrs Gascons.

— 3000 èuros entà l’edicion d’un recuelh ContesCharnèguesAufildelaBidouze per Bidache Culture.

— 4000 èuros entà la mesa en plaça peu CFPÒC Navèra Aquitània de jornadas d’iniciacion a la lenga “Familhas en Lenga” entaus pairs d’escolans qui an un contacte (sia a Calandreta, en site bilingüe, en ahortit, en opcion...) dab la lenga.

— 5000 èuros entà la sèria audiovisuau en occitan a l’entorn de Pelòt per l’associacion Art’Òc.

— 24 000 èuros entaus dus projèctes de la Federacion Departamentau Calandreta: la creacion deu Pòl Educatiu de Pau (qui agroparà la calandreta de Pau, la de Masèras e lo Collègi de Gasconha en un sol endret) e l’obertura d’ua calandreta a Vilhèra en seteme de 2019.

— 2500 èuros entà la reedicion deu Diccionari deu bearnés e gascon modèrnes de Simin Palay.


 

Aquesta serada qu’estó tanben lo parat per Daniel Barneix, president de l’associacion Ligams, de har un bilanç deus positius de La Passem 2018 e de’ns desvelar en avantpurmèra quauques informacions sus La Passem 2020.

 

En efèit, aquesta que’s veirà alargada tant peus quilomètres com per la durada. 600 km que seràn corruts en 2020 en 72h, sian 4 dias e 3 nueits shens cès ni repaus, qui ns’amiaràn dinc a Bigòrra e las Lanas.

 

Tienetz-ve a l’argüeit de las novèlas suus hialats sociaus (Facebook, Twitter, Instagram: @LigamsLigams) e tanben suu site lapassem.com

 

 

 

 

L’esquipa de Ligams
 
 
 
 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
3.

Una gran idea aquesta de correr per la lenga, e los dinerets que son tan necessaris per activitats a favor de la lengo. Mas tamben caldria demandar diners a l'UE que dóna diners per aquestes causas non lucrativas a favor de la cultura.

  • 2
  • 0
Gerard Joan Barceló Pèiralata
2.

#1 Èra d'efièch una omission involontària dins l'article. Ara ne parlam. Mercés per la lectura atentiva!

  • 8
  • 0
Gaujós
1.

E la reedicion deu Palay per las edicions Reclams, ne'n parlatz pas? Que pensavi qu'avèn ganhat quicòm tanben, non? Que parlatz de 7 projcètes, mes ne n'i a pas que 6 sus a lista...

  • 6
  • 1

Escriu un comentari sus aqueste article