Bandièra01 capçalera  1180x150: Novestivada

Actualitats

crotz-tolosaCreated with Sketch.LengadòcLengadòc BasMontpelhierenc

Seta. Una fèsta d’anniversari es venguda una tragèdia

Un òme “exasperat” pel bruch fusilhèt sos vesins en provocant 2 mòrts e 2 ferits

Un òme tirèt contra sièis personas e un enfant de 3 ans, qu’èran en un apartament de Seta (Montpelhierenc) e que festejavan un anniversari. Lo bilanç es de dos mòrts e dos ferits.
 
Lo presumit autor de la fusilhada es un òme de 49 ans qu’es ja en garda a vista e acusat d’assassinats e de temptativas d’assassinat.
 
Cap a 2 oras del matin, lo presumit tiraire, “exasperat pel bruch”, davalèt per demandar als vesins que festejavan l’anniversari de baissar la musica. En recebent una responsa negativa, lo suspècte los auriá menaçats: “me’n torni en cò mieu e davali vos tuar”, çò declarèt al parquet de Montpelhièr.
 
E aital o faguèt, amb un pistolet de gròs calibre (11,43 mm), tirèt sèt còps. Dins l’apartament i aviá sièis personas e un enfant de 3 ans. Un parelh e l’enfant capitèron de s’amagar e sortiguèron indemnes de l’atac. Un dels ferits, tocat per doas balas, capitèt de telefonar als secorses.
 
Lo suspècte èra l’instructor d’un centre de tir d’Agde e trabalhava coma collector d’escobilhas per la collectivitat de l’Estanh de Taur. Dins son apartament an trobat sièis armas e 5000 municions que possedissiá legalament.
 
L’òme “dormiá pas mai”, segon çò que declarèt als policièrs, e preniá de medicaments per dormir dempuèi que los sieus oraris de trabalh foguèron modificats. Aquel jorn se deviá levar tornarmai a 4 oras del matin per anar trabalhar.
 
“Exasperat”, s’avisèt d’aver agit “un pauc inconscient en vesent lo sang de las victimas”, çò apondèt l’òme, qu’afirmava d’aver trobat puèi sos esperits, e quand acabèt de tirar, decidiguèt de tornar a l’ostal per esperar la polícia.

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

La Molièra Molin de Baish
2.

Correccion:
La civilisacion deu paratge
Qu’ei vaduda deu cambriolatge
Ailàs, qu’ei morta la convivéncia
Qu’a deishat plaça tà la violéncia !
E serà donc Garona pro larga
Tà asselar los gascons d’esta plaga ?

  • 0
  • 0
La Molièra Molin de Baish
1.

La civilisacion deu paratge
Qu’ei vadut la deu cambriolatge
Ailàs, qu’ei morta la convivéncia
Qu’a deishat plaça tà la violéncia !
E serà donc Garona pro larga
Tà asselar los gascons d’esta plaga ?

  • 0
  • 0

Escriu un comentari sus aqueste article