La polemica reforma de las pensions sera impausada sens vòte de l’Assemblada Nacionala francesa. Lo govèrn recorrerà a l'article 49.3 de la Constitucion francesa, que permet al primièr ministre d'engatjar sa responsabilitat sus un tèxt de lei e de lo far adoptar sens l'aprobacion dels deputats. Lo quite primièr ministre, Édouard Philippe, o anoncièt dissabte passat a la tribuna de l'Assemblada après aver lo fuòc verd del conselh dels ministres.
 
"Totas las oposicions son legitimas, totas las contestacions son exprimidas, mas dins lo respècte de la democracia", çò diguèt Philippe que se justifiquèt en disent que voliá “metre fin a aqueste episòdi de non-debat”.
 

Conformément à l’article 49 alinéa 3 de la Constitution de 1958 et après en avoir obtenu l’autorisation du Conseil des ministres du 29 février, j’ai décidé d’engager la responsabilité du Gouvernement sur le projet de loi instituant un système universel de retraites. pic.twitter.com/Q3GtnGgc0A

— Edouard Philippe (@EPhilippePM) February 29, 2020

 
Segon France 3, lo primièr francés aviá anonciat la possibilitat d'activar aquel article, en afichant son objectiu "d'adoptar la reforma abans l'estiu" e en soslinhant qu'èra necite qu'en març foguèsse adoptada en primièra lectura a l'Assemblada dicha nacionala.
 
En mai dels elegits d’LREM, Philippe ten lo sosten dels deputats centristas del MoDem que creson que l'aplicacion de l'article 49.3 es la "sola pòrta de sortida possibla a aqueste blocatge inconsiderat e perilhós per nòstra democracia".  Pasmens, tanben creson que lo tèxt somés "deu incontestablament èsser enriquit de las avançadas ja discudidas entre los partenaris socials e lo govèrn".
 
 
Una reforma contestada socialament
 
Dempuèi lo començament de decembre, an luòc de protèstas e de caumas per denonciar aquela reforma, que vòl impausar un sistèma unic que faga desaparéisser los 42 regims de retirada existents a l’ora d’ara, segon lo mestièr.
 
Aquel nòu sistèma foncionariá per ponches, es a dire que l’argent que los salariats cotizan per pagar las pensions dels retirats seriá tresmudat en de ponches que se transformarián en una pension mesadièra lo jorn de la retirada. Los sindicats qualifican la reforma d’ultraliberala e asseguran que farà davalar fòrça las pensions. En mai d’aquò, la pension se recalcularà en foncion de la situacion economica e del PIB. Totes los ans comptaràn per la transformacion en ponches: tanben los ans de salaris fòrça basses, o los ans de caumatge o de pausas. Atal, los sindicats calculan qu’amb aqueles cambiaments las pensions demenirián d’entre un 20% a un 30%.
 
 
181 novèls emendaments jamai examinats
 
De son costat, Jean-Luc Mélenchon, assegura dins son blòg qu’aquela aplicacion del 49.3 valida 181 novetats jamai examinadas. L'elegit esquerrista francés, president del grop de La França Insomesa, assegura que lo govèrn a apondut 181 emendaments que degun, ni majoritat ni oposicion, ni "partenaris socials" an pas jamai vistes, legits, estudiats. Segon Mélenchon, demest aqueles 181 esmendaments i a lo contengut de 7 ordenanças qu'introduson de centenats de disposicions desconegudas.