Bandièra01 capçalera  1180x150: Novestivada

Actualitats

An espionat lo telefòn mobil del president del Parlament de Catalonha

Mai d’un centenat de personas, dont Roger Torrent e l’independentista exiliada Anna Gabriel, son estadas espionadas amb un logicial per telefòns intelligents que solament los govèrns dels estats pòdon aquerir


 


Lo telefòn mobil del president del Parlament de Catalonha, Roger Torrent, foguèt espionat long de l’an passat, amb un logicial que sonque los govèrns dels estats pòdon aquerir, çò rapòrta una informacion desvelada pels jornals El País e The Guardian. Los quotidians rapòrtan un estudi de ciberseguretat de l’Universitat de Toronto; aquesta a enquistat sus una error de Whatsapp gràcias a la quala a pogut intervenir dins lo telefòn de Torrent e los d’un centenat de personas, dont d’independentistas coneguts coma Anna Gabriel, èx-deputada en exili.
 
Torrent a confirmat a la Television de Catalonha (TV3) que los jornalistas l’avián informat d’aquel espionatge e n’acusa lo govèrn espanhòl, mas Madrid desmentís tota relacion. Pasmens, l’espionatge s’es fach amb un logicial nomenat Pegasus, fach per la societat israeliana NSO e que solament lo vendon als govèrn dels estats. Per aquela rason, Torrent assegura qu’aquò demòstra que los aparelhs de l’estat espanhòl perseguisson la dissidéncia politica, çò que per el “es impròpri d’una democracia e fa perilhar los dreches fondamentals dels ciutadans”. A mai, Torrent a exigit que lo govèrn espanhòl comparesca en public per donar d’explicas. “Volèm que s’enquiste sus totes los faches e que se’n depure totas las responsabilitats”, çò a dich.
 
Lo logicial s’introdutz dins lo telefòn mobil per mejan d’un apèl vidèo de WhatsApp que la victima i deu pas quitament respondre. Un còp que lo logicial es installat, los espions an accès a tot lo contengut del telefonet e pòdon quitament activar a distància lo microfòn e la camèra, çò que permet un espionatge considerable.


 
 
 
 
 
 
 
 
 
 
 
abonar los amics de Jornalet
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Racatge Jornalenc
4.

uTorrent es illegal en Espanha

  • 0
  • 1
Black Blòc Joe
3.

"A mai, Torrent a exigit que lo govèrn espanhòl comparesca en public per donar d’explicas. “Volèm que s’enquiste sus totes los faches e que se’n depure totas las responsabilitats”, çò a dich." Quora passarà, lo govèrnament espanhòl, davant lo Tribunal Penal Internacional ?

  • 11
  • 0
Franc Bardòu
2.

A governança criptofasicsta, metòdis criptofascistas…

#1 L'estalinsime non se pòt de ges de biais confondre amb lo libertarisme republican d'esquèrra vertadièra que lutèt fins al darrièr pols contra lo fascisme franquista que ne vesèm adara grelhar las fruitas amagadas.

  • 9
  • 0
Pitaluga
1.

E Squarzzini, "la Làmia", espionava Fakir, Ruffin e d'autres pel compte de Bernard Arnaud. Aquelas democracias (França, Espanha e d'autras...) revèrtan cada còp mai l'URSS de Stalin que los milionaris venguts miliardaris criticavan tant!

  • 8
  • 3

Escriu un comentari sus aqueste article