La justícia chinesa ven de condemnar Zhang Zhan a quatre ans de preson. S’agís d’una jornalista detenguda per aver raportat las intensas restriccions impausadas a Wuhan al començament de la pandemia de la covid-19. L’an condemnada per “crear de conflictes”, un delicte d’òrdre public utilizat per reprimir la dissidència.
 
 
En cauma de la fam
 
Zhang es en cauma de la fam per denonciar son encarceracion e, segon sos avocats, son estat de santat es inquietant. “Semblava aclapada quand li anoncièron la senténcia”, çò a dich a l’AFP son avocat Ren Quanniu.
 
 
“Difusion maliciosa”
 
Zhang es una documentarista independenta qu’en febrièr se gandiguèt a Wuhan per documentar la vida dins la vila pendent la pandemia. D’aquí estant, comencèt de retransmetre en dirècte e de raportar çò que vesiá per carrièras —ont èra enebida la circulacion pr’amor del confinament—, l’actitud de las autoritats chinesas e l’estat dels espitals.
 
L’escrich de l’acusacion contra ela assegura que Zhang a partejat “d’informacions falsas per mejan de tèxtes, vidèos e d’autras plataformas coma WeChat, Twitter e YouTube”. En mai d’aquò, l’acusan tanben d’aver acceptat d’entrevistas de mèdias internacionals e d’aver “difusat maliciosament” d’informacions sul virus a Wuhan.
 
 

China jails citizen journalist Zhang Zhan for 4 years for reporting on the virus in Wuhan. She has been on a hunger strike since June and is reportedly force-fed via a nasal tube.

China has punished 8 virus whistleblowers so far.

Her lawyer Zhang Keke talks to the press pic.twitter.com/3SKLCMXeP9

— AFP News Agency (@AFP) December 28, 2020