D’aquesta passa amb la covid comèrcis, bibliotècas, salas escuras, piscinas, musèus, festenals, salas d’espòrt, universitats... arrèstan pas de calcular per téner la mesura. Una mesura cambiadissa.

Eleonòra ten un comèrci de casquetas, parapluèjas e maitas besingonhas. A una botiga de uèch metres cairats dempuèi mai de dètz ans. Quora crompèt la botiga pensèt pas qu’un jorn la superfícia pegariá amb aquela impausada per la Covid. Coma dempuèi lo dètz e nòu de mai li caliá uèch mètres cairats per persona, ne podiá aculhir pas qu’una. Ela, se deviá tener sul trepador, amb la maquina per encaissar. A partir del nòu de junh aurà la causida: podrà aculhir doas personas e Eleonòra demorarà totjorn defòra amb sa maquina o alara aculhirà una persona e demorarà dedins per encaissar. Pensi que causirà lo segond biais. D’efièch, me diguèt que lo mai malaisit per ela èra pas d’encaissar mas d’esperar afrejolida jos la pluèja que crompaira o crompaire volguèsse ben sortir! 
 
Esteveneta es emplegada dins una bibliotèca comunala. Quora aprenguèt qu’a partir del 19 de mai caliá uèch mètres cairats per persona, vos disi pas lo rambalh! Li calguèt mesurar la superfícia de sa bibliotèca, mas que mesurar? Soncament la sala de lectura, i ajustar los burèus? las resèrvas? S’a la superfícia de la bibliotèca caliá levar la plaça presa pels armaris, los pòrtadocuments, las laissas portairas de libres? La plaça presa per la taulas e los cadierals dins la sala de lectura? Se rambava tot lo mobilièr e tancava los libres dins las resèrvas, podiá aculhir vint personas. Se servava las taulas e tot lo necite ne podiá aculhir pas que uèch. Aprèp de soscadissas longarassas, fin finala, decidiguèt de n’aculhir dètz en tirant tres taulas e dotze grandcadièras de la sala de lectura. A partir del nòu de junh es vint que n’aculhirà!
 
Jaume, el, gerís tres salas escuras. Una grandassa de cinc cents doas plaças, una mejana de tres cents trenta quatre e una pichona de nonanta cinc plaças. Dempuèi lo dètz e nòu de mai, pòt aculhir lo  trenta cinc per cent de la capacitat de las salas. Per la sala granda pas de lagui, mas vos disi pas per la mejana, e pièger encara per la pichona. Aprèp de soscadissas prigondas capitèt de trobar la capacitat de caduna de sas salas. Mas lo 9 de junh se deurà tornarmai far virar lo cervèl per passar del trenta cinc per cent al seissanta cinc per cent! Un còpatèsta d’aitan mai còpatèsta que cada sala possedís de sètis plegadisses al som de cada rengada. S’un sèti plegadís compta coma un sèti regde? Se compta per mitat? Se compta pas?
 
E per la piscina municipala es encara pièger! Natasha que se tracha de las intradas dempuèi qualques jorns a la tèsta que bolhís entre los que se banhan, los que son en cabina que s’aprèstan a se banhar, los que se son banhats mas que charran amassa e qu’an pas encara quitat la piscina, los que viran a l’entorn del bacin mas qu’an pas encara cabussat! Se lo trenta cinc per cent se mesura a l’intrada de la piscina o als que van cabussar o als qu’an cabussat e que nadan?
 
Amb la covid es ben malaisit de téner la mesura. Mesura de mesurar amb mesura!
 
 
 
 
Clamenç
umorista de lenga occitana
 

            

fffff		fffff		fffff
	Lo confinament dels legeires de Jornalet
			Sès confinat a l’ostal? As, totun, de connexion a Internet? As de bonas idèas per passar lo temps? Jornalet demanda a sos legeires que partegen lors idèas e lor vida en confinament amb un messatge de tèxt, una fòto, un vidèo, un àudio o qué que siá que se pòsca publicar en linha e partejar amb los autres legeires. As bastit un castèl de carton pels enfants? Fas d’escalada dins la cosina? As organizat un concèrt per videoconferéncia? Tenes una vida sociala sus las fenèstras o los balcons? Fas d’espòrt a l’ostal? As de bons libres a nos recomandar? De bonas idèas per èsser tostemps de bona umor?
	Manda tos documents a info@jornale... Convivéncia e paratge en confinament.