Bandièra01 capçalera  1180x150: Novestivada

Actualitats

Las diferentas estrategias dels caps politics per far vaccinar lo mond

Un article de The Guardian analisa las diferentas mesuras, las responsas socialas e l’urgéncia de se far vaccinar contra la covid-19

| @Anpeial

Tèxte legit

De govèrns de pertot, de societats del sector del léser e d’universitats de tota la planeta an començat d’insistir sus la vaccinacion a causa de la respelida de cases de covid-19, deguts sustot a la varianta dèlta. Las estrategias son, pasmens, diferentas: cèrts govèrns prepausan d’argent o de vacanças del temps que d’autres impausan lo vaccin obligatòri. Las reaccions socialas son tanplan divèrsas, çò rapòrta The Guardian dins un article de Peter Beaumont.


Lo passapòrt sanitari
 
En Aran, dins la prima, foncionèron plan la campanha d’informacion e la guida de vaccinacion que la Generalitat de Catalonha faguèt en occitan. A mai, lo Conselh General d’Aran avièt un bon plan de vaccinacion qu’arribèt a tota la populacion.
 
Pasmens, dins la rèsta del país, lo desvolopament del passapòrt sanitari dins los estats francés e italian a menat de milièrs de personas a manifestar per carrièras, e quitament a afrontar la polícia. Los manifestants refusan l’exigéncia del passapòrt per accedir a las activitats socialas talas coma sopar dins un restaurant, vesitar un musèu o anar dins un estadi.
 
D’autre caire, après l’anóncia del passapòrt sanitari pel president Emmanuel Macron, cinc milions de personas recebèron lor primièra dòsi e mai de sièis milions la segonda en solament doas setmanas. Dins las setmanas precedentas, la demanda de vaccins èra a davalar. En Itàlia, segon lo comissariat especial per l’immunizacion, dins qualques regions aumentèt la demanda de vaccins, fins al 200%, tanlèu que lo govèrn aguèt anonciat son “green pass”.
 
E mai siá contestada, la mesura de Macron la sostenon fòrça responsables de la santat publica. “Nòstre trabalh es garir lo mond, non pas los tuar”, çò diguèt Patrick Pelloux, president de l'Associacion dels Mètges Urgentistas de França. "Avèm lo dever etic e civic de nos vaccinar e de conténer las infeccions de covid dins los espitals", çò precisèt.
 
A mai, The Guardian soslinha que l'iniciativa de Macron a cambiat l'actitud dins un dels estats europèus mai reticents a l’immunizacion. Fa qualques meses, a pena lo 40% dels ciutadans franceses se disián dispausats a se far vaccinar.
 
 
“La libertat s’acompanha de responsabilitat”
 
Als Estats Units, lo president Joe Biden a presentat una politica qu’obliga los foncionaris de se vaccinar e a passar un provament setmanièr. Aital, l’administracion federala a jonch las societats privadas coma Facebook o Google que fòrçan lors salariats de se vaccinar. Tanben o an fach de cònsols màgers de grandas vilas coma Nòva York. “A l’ora d’ara, i a tròp de gents que morisson e que veson a morir un èsser aimat”, çò diguèt Biden als jornalistas en tot assolidar que “la libertat s’acompanha de responsabilitat”. Dins aquel sens insistiguèt: “Vaccinatz-vos per vosautres, per vòstres èssers aimats e per vòstre país”.
 
D’autre latz, Biden a demandat als govèrns dels estats que prepausen un chèc de 100 dolars a cada persona que se faga vaccinar.
 
 
Duterte vòl confinar los non-vaccinats
 
Mentretant en Filipinas, lo controversiat president Rodrigo Duterte vòl que los non-vaccinats pòscan pas quitar lor domicili.
 
 
La rason d’aqueles esfòrces per vaccinar totòm
 
Segon l’article de The Guardian, la rason d’aqueles esfòrces mondials per intensificar la vaccinacion es una convergéncia de factors. Delà l’aument d’infeccions a causa de la varianta dèlta i a tanben la paur que lo movement antivaccins meta en perilh l’immunizacion generala contra la malautiá.
 
De tot biais, sembla que cèrts govèrns constatan que, malgrat las protèstas, l’obligacion fonciona. D’efièch, un sondatge de la Kaiser Family Foundation assegura qu’als Estats Units i a un 10% de personas que sabon pas qué far del temps que lo 6% espèra que i aja una obligacion formala per s’anar vaccinar.
 
 
Se l’obligacion es etica?
 
Al començament de l’an, lo professor d’etica practica de l'Universitat d’Oxford Julian Savulescu escriguèt dins Journal of Medical Ethics que las condicions per establir un vaccin obligatòri passan per l’idèa de John Stuart Mill: cal restrénher la libertat d’un individú quand sas accions meton los autres en perilh. Pasmens, Savulescu assegurava que prepausar d’incitacions a la vaccinacion èra l’opcion mens socialament problematica.

 


abonar los amics de Jornalet

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
8.

Aquí en Mallorca que viuen del torisme ajuda plan s'estan vacunats,e tanben per la feina qu'es lo mai important. Afortunadament aquestes meses d'estiu an obert molts d'otels e se vei molta animacion turistica, quedan paucas setmanas per acabar lo mes e amb l'ajuda de Déu tot anirà plan.

  • 0
  • 0
MOSCA CANHISCA
7.

#6 De l'estudi, que'n parlèn quan parescó. N'a pas hèit autant de brut en Israèl com en Euròpa, d'aulhors. N'ei pas considerat com hidable en plen per'mor d'un escantilh tròp petit. E vos, ne voletz pas convéncer lo monde ? Solament, la conclusion qui tiratz d'aqueth estudi, los israelians ne l'an pas tirada. Qu'ei estranh, non ?

https://www.lemonde.fr/planete/article/2021/07/30/en-israel-la-reprise-de-l-epidemie-encore-sous-controle-grace-a-la-vaccination-de-masse_6089965_3244.html

https://www.lemonde.fr/les-decodeurs/article/2021/07/02/covid-19-les-vaccines-representent-40-des-nouveaux-cas-en-israel-et-c-est-une-bonne-nouvelle_6086759_4355770.html

  • 1
  • 1
Batko
6.

#5 Aqueste jornau es pas vertadièrament un jornau medicau mes politic, e parlan quitament pas de l'estudi que ditz que lo vaccin protegís pas que a nautor de 39%, a maugrat lo hèit qu'aqueste estudi veng d'Israèl. I a pas que lo títou qu'es explicatiu, vòlon convéncer lo monde.

  • 2
  • 1
Batko
4.

S'èi plan legit, un non-vaccinat seré quaququ'un deu quau "sas accions meton los autres en perilh". Lavetz que sabèm plan ara que lo vaccin protegís pas brica d'estar tocat peu virus e de'u passar aus autes.
Fòrça mètges an dit que l'actitud de vaccinats (pas totis, solide) qu'an deishat los gèstes-barralhas ("Se que non, perqué se vaccinar ?") an participat a un navèth creish de la malautia.
L'informacion es vitala aicí. Segon lo darrèr estudi israelian, lo vaccin protegís pas que a nautor de 39% contra lo virus. Aquò vòu díser que, se los vaccinats son protegits de las fòrmas grèvas de la malautia, pòden a 61% estar tocats peu virus e lo passar a quauqu'un mès.

  • 5
  • 5

Escriu un comentari sus aqueste article