Bandièra01 capçalera  1180x150: Novestivada

Actualitats

crotz-tolosaCreated with Sketch.GuianaAgenésSèrras d'Agenés

Un encontre insolit: Liszt-Jansemin

Un espectacle a l’onor del pianista ongrés e del poèta occitan fa reviure lor rescontre de 1844 a Agen

| Mossot

Tèxte legit

Lo 20 de setembre de 1844, Franz Liszt venguèt donar un recital al teatre Moncorny d’Agen, que precediguèt lo teatre Ducourneau, convidat per son amic Jansemin. Aquel concèrt, donat abans que Liszt partiguèsse per Espanha, demorèt mitic dins los annals ageneses.
 
Gràcias a l’associacion culturala occitana Agenés Tèrra Occitana, sa magia va tornar viure en vestits d’epòca lo dimenge 19 de setembre 2021 a 3 oras del vèspre al teatre Ducourneau dins l’encastre de las Jornadas del Patrimòni. De fach, se tracta, amb lo sosten de la vila d’Agen, d’onorar lo patrimòni agenés sul plan lingüistic e cultural.
 
La primièra partida d’aquel espectacle serà consacrada a Jansemin dins son temps amb animacion musicala pels musicians e cantaires de la “Companhiá Viratge” d'Agen e amb Philippe Bonneu al piano, e de lecturas d’extraches de las òbras de Jansemin per Joan-Pèire Alari e lor revirada en francés desfilaràn simultanèament sus un ecran.
 
En segonda partida, Christian Moulié legirà d’extraches d’un tèxt de Jacques Clouché qu’anonciava la venguda de Liszt a Agen.
 
Lo pianista agenés, Fabien Prou, tornarà jogar las pèças del programa causit per Franz Liszt per son concèrt.
 
Christian Moulié cantarà Faribolo Pastouro, extrach de Françouneto, la romança de Jansemin sus la quala Franz Liszt improvisèt.
 
Dins una restitucion d’un eveniment istoric, Joan-Pèire Alari, jogant lo ròtle de Jansemin, intervendrà de la lòtja del teatre estant, a esquèrra de la scèna, a la fin de l’espectacle en getant de coronas de laurièr sus la scèna e en declamant en occitan una òda a Franz Liszt dont la revirada en francés serà disponibla sul programa.
 
Amb aquel espectacle, Agenés Tèrra Occitana onora lo poèta occitan, Jansemin, que rend Agen fièr e qu’a un espaci dedicat al Musèu de las Bèlas Arts, e un dels pianistas e musicians mai grands de totes los temps, Franz Liszt.
 
 
 
 
Joan-Pèire Alari
Agenés Tèrra Occitana




 
Un encontre insolit: Liszt-Jansemin
19 de setembre de 2021 a 3 oras
Teatre Ducourneau (Pl. del Dr Esquiròl, 47000 Agen)
 
L’espectacle serà gratuit mas la reservacion es obligatòria en telefonar al +33(0)5 53 66 26 60.
Lo passador sanitari serà demandat a l’entrada del teatre
Un programa ricament illustrat vos serà prepausat al prètz modic de 2 èuros

 
 


 
 abonar los amics de Jornalet

 


 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article