Bandièra01 capçalera  1180x150: Novestivada

Actualitats

Descreditada l’enquista qu’acusa de terrorisme 13 independentistas catalans

Dos ans apuèi, los jutges an reconegut qu’es pas brica clar per quin delicte se dobriguèt l’enquista de la Gàrdia Civila

Tèxte legit

Lo 23 de setembre de 2019, sèt independentistas catalans foguèron arrestats e encarcerats dins una operacion mediatica e espectaclosa sonada “Operacion Judàs”. Èran acusats de terrorisme per l’Audiéncia Nacionala espanhòla, un tribunal d’excepcion especializat en aquela sòrta de crimes e delictes. Qualques meses pus tard, acusèron quatre personas de mai. Fin finala, 13 independentistas son acusats d’aver fabricat d’explosius e mai se siá pas trobat cap d’explosiu.
 
Ara, mai de dos ans apuèi, los jutges an reconegut que “se desconeis l’origina de l’enquista”. Asseguran qu’es pas brica clar per quin delicte se dobriguèt l’enquista de la Gàrdia Civila que temptava de demostrar que los detenguts fasián partida d’una organizacion terrorista que se presumissiá que planificava d’accions violentas per defendre l’independéncia de Catalonha.
 
La resolucion dels jutges l’an facha en responsa a una question pausada pels avocats, qu’avián demandat que se poguèsse interrogar los agents de la Gàrdia Civila que faguèron l’enquista, per comprene d'ont sortissiá l’acusacion e per se poder defendre. Ara, l'Audiéncia Nacionala espanhòla admet que s'interroguèt aqueles agents, per aver “tota l’informacion que se poguèsse obténer d’eles” e poder garentir lo drech de defensa dels acusats.
 
Al moment de las detencions, se mobilizèt 500 agents de la Gàrdia Civila, se faguèt 10 perquisicions d’ostals dins 7 vilas de Catalonha. Los detenguts los menèron en preson preventiva a Madrid, en regim reservat als terroristas, fins que qualques meses pus tard los metèsson tornarmai en libertat per manca de pròvas. Los mèdias espanhòls ne parlèron en fasent creire qu’avián trobat dins los ostals dels detenguts de produches per fabricar d’explosius, qu’en realitat èran de produches de netejatge abituals dins un ostal.
 
 
 
 


abonar los amics de Jornalet

 

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article