Bandièra01 capçalera  1180x150: Novestivada

Actualitats

La revirada de Salvini fàcia a un cònsol màger polonés: “Ai pas cap de respècte per vos”

Lo dirigent d’extrèma drecha italian a totjorn mostrat son afinitat amb Putin, mas ara los eveniments en Ucraïna l’an obligat de cambiar de posicion

Tèxte legit

La vesita de Matteo Salvini a Polonha s’es virada contra lo dirigent italian d’extrèma drecha, qu’es estat reprimandat d’èsser amic de Putin pel cònsol màger del vilatge de Przemyśl. L’intervencion, ont se pòt veire Salvini clarament a malaise, l’an partejada de milièrs de còps sus Twitter.
 
Salvini s’èra desplaçat en Polonha per sosténer los refugiats ucraïneses e deviá far ièr dimars a miègjorn una compareissença a la gara de Przemyśl, un vilatge près de la frontièra amb Ucraïna, qu’es un dels principals ponches d’intrada en Polonha dels refugiats ucraïneses. Ça que la, lo cònsol màger, Wojciech Bakun, interrompèt lo parladís del politician italian en tot l’acusar, en polonés, d’èsser admirador de Putin.
 
“Ai pas cap de respècte per vos”, çò apondèt, aquel còp en anglés. “Venètz amb ieu a la frontièra e condemnatz-lo [Putin]”, çò insistiguèt Bakun. Quand Salvini ensagèt de l’interrompre per explicar qu’el èra anat en Polonha per “ajudar los refugiats, los enfants, las maires e los pares d’Ucraïna”, lo cònsol li respondèt que lo pensava pas recebre.
 
En seguida, Bakun brandiguèt una camiseta amb la cara de Putin, ont èra escrich en rus “armada de Russia”, tot en apondent que solament l’acompanhariá al camp de refugiats s’acceptava de la tornar portar. Èra una camiseta coma la que la portava Salvini dins una vesita a Moscòu en 2014. En rèireplan, se poguèt ausir d’insultes en italian de part del public.
 
Salvini èra ja conegut per sas accions contra los refugiats. A mai, en 2019, diguèt que Putin èra “lo melhor cap d’estat del Mond”. Ara, totun, èra anat en Polonha per mostrar sa solidaritat amb los refugiats ucraïneses. Sembla doncas que l’impopularitat de l’invasion russa d’Ucraïna l’aja obligat de cambiar de vejaire e de rebutar son admiracion per Putin e son mesprètz pels refugiats.
 
Salvini, ça que la, a evitat fins ara de condemnar lo president rus d’un biais explicit, un problèma que tanben l’an d’autres caps europèus d’extrèma drecha coma Marina Le Pen, que la setmana passada retirèt de milions d’exemplars de son programa electoral perque i aviá una fòto d’ela amb Putin.
 
 
 
 
 
 


abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article