D’aicí a qualques jorns poirem veire en primièra dins los cinèmas lo filme francés La revanche des crevettes pailletées (Lo revenge de las cambaròtas palhetadas) dels realizaires Cédric Le Gallo e Maxime Govare. Tornada en Ucraïna, s’agís d’una sequèla de Les crevettes pailletées (2019) que pren ara un sens especial pr’amor que l’80% de la còla es compausada d’ucraïneses.
 
Lo filme de 2019 èra inspirat d’una istòria reala e voliá denonciar l’omofobia del temps que mandava un messatge de vam e d’estrambòrd a la comunautat LGBT. Dins aquesta segonda partida, l’esquipa de waterpolistas que participèt amb estrambòrd als Gay Games de Croàcia, se devon gandir a Tòquio per la nòva edicion de la competicion. Mas per aver mancat lor correspondéncia per Japon, son obligats de passar per Russia, dins una region fòrça omofòba. Lo filme cèrca doncas de denonciar la persecucion que la patís lo collectiu LGBT dins la Russia de Putin.
 
Precisament a causa d’aquela persecucion rodèron pas lo filme en Russia mas en Ucraïna. “Tornar en Russia foguèt impossible, a causa de la lei qu’enebís la propaganda LGBTI, enregistrar dos òmes que se potoneja per carrièras nos auriá menats totes a la preson”, çò explica Govare.
 
De son latz, per Le Gallo lo filme a pres ara una importància especiala: “Lo filme explica cossí Putin oprimís la comunautat LGBTI, e uèi Putin nos oprimís a totes”.
 
Efectivament, après l’invasion russa d’Ucraïna, la vida de la còla ucraïnesa de las cambaròtas es estada radicalament cambiada. Per exemple, una de las actrises es ara refugiada amb sos enfants dins lo mètro de Kharkiv, qualques membres se son exiliats en França del temps que d’autres an pres las armas per defendre lo país.
 
Lo filme se presentèt en primièra al festenal de cinèma de L’Aup d’Ueis (Oesen).
 

Des comédiens des "Crevettes pailletées" se battent en Ukraine, un an après le tournage du deuxième film dans le pays pic.twitter.com/MKBN90p6YU

— BFMTV (@BFMTV) March 23, 2022