Après un “silenci covid” de doas annadas, lo festenau tornèt viure per lo grand plaser dau public present. Aviam preparat un programa variat amb una alternància de clips musicaus o poetics e de filmòts de 15 minutas au maxim. L’espaci occitan fuguèt ben representat dins sa diversitat. Passat e present s’i costegèron tant per l’istòria coma per l’economia, la creacion musicala o literària.
 
Tres occitanistas afogats venguèron d’Agenés per presentar son filme Bienvenue chez los palomaires de Bernard Lataste, e discutir amb nòstra còla dau biais d’organizar un festenau en cò sieu. Aquò nos faguèt grand gaug.
 
La municipalitat èra presenta, amb tres elegits, e la mediatèca nos reçaupèt dins de condicions idealas. En brèu, lo festenau de 2022 nos laissa una tras que bòna impression e mercejam lo public que se desplacèt maugrat lo pònt de l’Ascension e benlèu encara la crenta de la covid!
 
Fuguèt l’escasença de metre endavant la riquesa de la cultura occitana.
 
 
 
 
Lisa Gròs
Presidenta de TèVéÒc