De cercaires an trobat una manièra novèla de crear de noiridura vegetala sens utilizar de lutz solara en fasent servir una fotosintèsi artificiala. Aquesta tecnologia es basada sus un procès elèctrocatalitic, e tresmuda en acetat de dioxid de carbòni e d’electricitat en mai d’aiga. D’organismes que produson de noiridura, coma las plantas, consuman tanben aquel acetat en de luòcs escurs. E per ansin se poirà crear de noiridura vegetala fins a 18 còps mai qu’ara e sens lutz.
 
La còla de cercaires que faguèt l’experiment son de l’Universitat UC Riverside e de l’Universitat de Delaware. Lor recèrca foguèt publicada dins lo numeric Nature Foode describís cossí tresmudar a travèrs d’un procès elèctrocatalitic de dioxid de carbòni, d’electricitat e d’aiga en acetat, un dels ingredients del vinagre.
 
La reüssida arribèt quand los cercaires descobriguèron estonats que plusors plantas emplegavan aquel acetat tanben dins la sornièra per créisser. Lo començament del procès es un ensemble de panèls solars que genèran d’electricitat per fornir d’energia al procès elèctrocatalitic. “Avèm trapat un novèl biais de produire de noiridura vegetala en superant lo limit biologic de la fotosintèsi”, çò diguèt Robert Jinkerson, de l’UC Riverside.
 
A mai, los cercaires an desvolopat un sistèma qua’ajudava a crear de moleculas en utilizant sonque de dioxid de carbòni. E l’acetat produch foguèt màger quand reduguèron tanplan de sal minerala. L’experiment es considerat coma una brava capitada pr’amor que se sap plan que i a plusors organismes que demòran dins l’escuritat que tanben an coma noiridura d’acetats, per exemple de campairòls. Segon los cercaires, es un metòde encara mai eficaç que la quita fotosintèsi car l’estalvi d’energia es plan mai naut e la noiridura producha plan mai granda.
 
 
Lo potencial de la descobèrta
 
Per aqueles scientifics, aquela nòva tecnologia es fòrça importanta perque poiriá ajudar a desvolopar mai de culhidas sens lutz. Los cercaires poguèron far créisser, amb aquela tecnologia, de tomatas, de ris, e de peses sonque amb l’acetat produch dins la sornièra. E afirman que se poirà desenant aver mai de culhidas amb d’acetat.
 
Val pas lo dire que los scientifics soslinhan que l’experiment es important tanben pr’amor qu’amb de fotosintèsi artificiala se poiriá multiplicar l’estat actual de l’agricultura mondiala. D’en primièr, se poiriá començar de cultivar cèrts vegetals dins de vilas qu’uèi son pas de territòris agricòlas. E tanplan cal pensar a l’agricultura que se poirà crear fòra de la planeta.
 
“La fotosintèsi artificiala demòstra qu’ pòt aver mai de produccion amb mens de tèrra e qu’aital l’impacte sus l’environament serà mendre, çò diguèron dins lo laboratòri de Jinkerson ont s’èra tengut l’experiment. E dins l’espaci es una tecnologia que poirià fornir de noiridura a mai d’astronautas que fins ara”.(Legissètz la seguida).




 

---

Aqueste article es publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion.  Podètz legir l'article entièr aicí.