Bandièra01 1180x150: País Invisible

Actualitats

crotz-tolosaCreated with Sketch.GasconhaArmanhac

Armanhac: detenguts sièis militants ecologistas per aver interromput lo Torn de França

L’accion del collectiu Darrièra Renovacion exigís la renovacion energetica de totes los ostals en situacion de precarietat e que se reduga las emissions de gases d’efièch de sarra

| Dernière Rénovation

Tèxte legit

Detenguèron divendres passat en Armanhac sièis militants ecologistas del collectiu Darrièra Renovacion per aver interromput lo passatge del Torn de França entre los vilatges de Bocanhèras (País d’Aush) e Autarriba (Lomanha). Lo peloton foguèt arrestat qualques minutas dins la 19a estapa de la competicion esportiva en direccion de Caors. L’accion dels ecologistas exigís la renovacion energetica de totes los ostals en situacion de precarietat (aquò pertòca 12 milions d’abitants) d’aicí a 2030 e que se reduga las emissions de gases d’efièch de sarra, çò rapòrta Reporterre. Seràn jutjats davant lo tribunal correccional d’Aush per entrava a la circulacion de veïculs, segon  La Dépêche.
 
Lo 17 de junh passat, n’arrestèron quatre a Blan (Lauragués) qu’avián tanplan ensajat d’interrompre la corsa cicilista. Seràn jutjats en decembre a Castras per entrava a la circulacion e mesa en perilh de la vida d’autrú, çò raportèt La Dépêche. Èra pas lor primièra accion contra lo Torn de França.
 
Lo collectiu Darrièra Renovacion asseguran que l’inaccion del govèrn “condemna los franceses a patir d’èrsas de calor extrèma, de faminas de massa e de massacres”, e planh “l’abséncia d’un projècte de lei sus la renovacion energetica dels bastiments, qu’es aitan mai necessària dins lo contèxt de la guèrra en Ucraïna”. Per aquela rason asseguran que contunharàn “de perturbar lo foncionament normal del país, de sas infrastructuras e de sas competicions esportivas”.
 
Lo collectiu espeliguèt a la debuta de 2022 per exigir del govèrn de França aquel engatjament per la renovacion energetica. Lo grop s’es destriat en orquestrant maites blocatges rotièrs, en interrompent un partit de tènis durant lo torneg de Roland Garròs, lo 3 junh passat, e en arrestant lo Torn de França entre Morzine e Genèva lo 12 de julhet. Sas revendicacions son pas brica impopularas, per exemple lo correire canadenc de l’esquipa Grupama-FDJ Antoine Duchesne sostenguèt lo collectiu en fasent de declaracions a L’Équipe; “Vesèm amb las temperaturas qu’arriban que sèm dins una crisi umanitària. Es important que las gents manifèsten per aquò. Avèm totes besonh d’èsser sensibles fàcia a aquò”, çò diguèt.
 
 
 
 
 

abonar los amics de Jornalet

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Mea Culpa Magna Nimis
6.

Los ecologistas van sauvar la planèta e lo sistèma solari tot, MAS per MA fauta i van pas arribar. Me damne, me sabiai pas tan poderós !

  • 26
  • 19
illuminati
5.

#3 Los testimònis de Jeovah nos conflan parrièr !

  • 24
  • 17
666, la Torna
4.

#3 L'ecologisme es una sècta messianica de mai coma n'espelis tantas en periode de decadencia. Aqueles inocents s'imaginan que van manejar l'andana de l'Univèrs, Ah ! Ah ! Ah !

  • 18
  • 17
Pitaluga
3.

E lo medecin que diagnostica un cancre, lo cal arrestar tanben ?

E lo qu'enebis de se passejar sus la peirada quand es prevista una tempèsta, lo cal arrestar tanben ?

E lo que daissa pas bastir en zòna inondabla, lo cal arrestar tanben ?

Coma disiá lo Jacme lo Bèl : " L'ostal brutla e agacham endacòm mai". Pièger : arrèstan los qu'assajan d'avisar del dangièr.


  • 14
  • 17
666, la Torna
2.

Aqueles estabosits fan pensar a de profètas de l'Apocalipsi que passarian lor temps a bramar que s'avem la pèsta e autras maganhas es perque pregam pas pron lor bon dieu, pecaire !

  • 15
  • 23

Escriu un comentari sus aqueste article