Bandièra01 1180x150: País Invisible

Actualitats

Carressa e Cassabè: contunha lo combat contra una peirièra de gravas

Lo Tribunal Administratiu de Pau anullèt los arrestats prefectorals qu’autorizavan l’esplecha del sit industrial. Totun, lo Grop Daniel perseguís son activitat

| Güeitem l\'Arribèra

Tèxte legit

Lo collectiu Güeitem l’Arribèra crida a manifestar dissabte que ven, 22 d’octòbre, davant la comuna de Carressa e Cassabè (Enter dus Gaves) per dire tornarmai de non al projècte de peirièra d’extraccion de gravas del grop Daniel. De ciutadans e d’associacions se baton dempuèi 6 ans, en justícia e per carrièras, e ensajan d’avertir los elegits locals e los ciutadans de las consequéncias devastairas del projècte. Mentretant, 9 dels militants son enseguits en justícia per de “delictes de difamacion o d'injúrias publicas” pel fach d’aver avisat de las consequéncias dangeirosas de cavar al ras del riu.
 
En decembre de 2021, lo Tribunal Administratiu de Pau donèt rason al collectiu e anullèt los arrestats prefectorals qu’autorizavan l’esplecha del sit industrial. Ça que la, lo grop Daniel contunha son activitat jos un arrestat prefectoral dich de “mesuras conservatòrias”.
 
 
Cavar al ras dels rius es perilhós
 
Cavar a proximitat dels rius entraïna un risc d’avulsion,çò es qu’en cas de fòrta pluèja, la maire del riu poiriá èsser completament desplaçada, amb de consequéncias incommensurablas per las populacions e los ecosistèmas. “En Alemanha, al moment dels aigats de julhet de 2021, la vila d’Erftstast- Blessem, près de Colonha, patiguèt de degalhs irreversibles a causa d’una gravièra dins la quala s’èra encafornat lo riu”, çò remembra lo collectiu de defensa de l’environament.
 
 
Un mitan natural fragil
 
A mai, los estatjants crenhon mai que mai de consequéncias grèvas per las tèrras agricòlas, e fin finala lo borrolament de tota la vida vidanta dels estatjants del parçan.
 
La peirièra se fa dins un mitan natural fragil, una plana alluviala, mentre que doas enquistas publicas menadas abans lo projècte s’i son opausadas. Aquò foguèt pas pres en compte e sola una enquista privada que balhava l’aprobacion foguèt retenguda. Cal apondre qu’en riba del gave d’Auloron, la zòna es classificada Natura 2000, e que los cavaments metràn saique en perilh d’ecosistèmas ja pro fragils.
 
Delà la gravièra, los manifestants denóncian tanben un projècte regional de granda amplor destinat a servir los talhièrs de l’LGV (linha de tren de granda velocitat) Bordèu-Tolosa e de la còsta del Bascoat que contribuís a l’artificializacion creissenta dels sòls amb de risques d’aigats destruseires mai importants. En mai d’aquò, segon los membres de Güeitem l’Arribèra, i a pas de rason per que lo grop s’arrèste al perimètre d’autorizacion. Pertot ont son implantats, e especialament long del gave de Pau, an pas quitat d’espandir lors activitats que fan desaparéisser las tèrras agricòlas e menaçan l’anar natural dels rius.
 
 
 
 
 


abonar los amics de Jornalet

 



 
 
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Domi Salias
1.

''Güeitam''??? Praube occitanisme....

  • 8
  • 11

Escriu un comentari sus aqueste article