Bandièra01 capçalera  1180x150: Novestivada

Actualitats

Putin suspen lo darrièr tractat d’armas nuclearas amb los Estats Units

Sa compareissença davant las figuras màgers de la politica russa se tresmudèt en bilanç d’un an de guèrra en Ucraïna

Tèxte legit

Lo president de Russia, Vladimir Putin, anoncièt la suspension de la participacion russa del Nòu Tractat de Reduccion d’Armas Estrategicas (START), lo darrièr pache que Russia aviá signat amb los Estats Units per la reduccion e lo contraròtle de las armas nuclearas. O diguèt dimars dins l’encastre de son discors sus l’estat de la nacion, lo primièr que fasiá dempuèi que comencèt, arunan, l’invasion d’Ucraïna. Segon Putin, Russia “deu esser prèsta per far d'assages nuclears se los Estats Units los realiza abans”; totun, lo president rus precisa qu'abandona pas entièrament lo pache mas qu’i “suspen sa participacion”.
 
Aquela anóncia fa pojar mai encara la tension de la guèrra e arribèt just a l’endeman de la vesita que Joe Biden faguèt a Volodimir Zelenski. Dins son parladís, Putin s’afichèt coma la victima de las manòbras de l’Occident e prometèt que menariá la guèrra fins a sas darrièras consequéncias: “Ara qu’avèm començat contunharem”.
 
Lo messatge fasiá una mencion especiala a las regions de Luhansk, Donetsk, Zaporijjia e Kherson, que son las mai afectadas pel combat militar: “Exerciguèron lor volontat amb lo referendum d’èsser amb Russia, nòstra pàtria”.
 
La compareissença, davant totas las figuras màgers de la vida politica e civila de Russia, se tresmudèt en bilanç de la dicha “operacion especiala” qu’entamenèt fa un an. Putin tornèt dire qu’el aviá tostemps cercat una solucion pacifica en Donbass e qu'en decembre de 2021 aviá fach una proposicion, mas que tant l’OTAN coma los Estats Units i avián respondut negativament e mai amb una expansion militara: “Vòlon acabar amb nosautres e transformar un conflicte local en conflicte global, mas comprenon pas que Russia es invencibla sul prat batalhièr”.
 
Dins lo meteis sens critiquèt la preséncia militara dels Estats Units. “Cap de país a pas tantas basas de militaras coma eles, tota la planeta es plena de basas, solament basta d’agachar una mapa”.
 
A mai de criticar los Etats Units e Kyiv, Putin tanben se planguèt dels païses occidentals que segon el, an participat a la desinformacion, a barrar los uèlhs “davant las represalhas e los assassinats politics entre las mans de Kyiv”, de formar de batalhons  nacionalistas e provesir de laboratòris biologics e d'armas al “regim de Kyiv”.
 
Davant los convidats al parladís, dont de membres de las doas cambras parlamentàrias e del govèrn rus, e de personas qu’an combatut en Ucraïna, lo president rus encoratgèt la populacion russa e anoncièt divèrses investiments e d'ajudas per estimular l’economia russa. Una economia que reconeguèt greujada per las sancions e lo blocatge economic: “La tòca es de far patir nòstres ciutadans, destabilitzar nòstre pòble. Mas o an pas pogut perque nòstre sistèma es mai fòrt que çò que cresián”. Putin se felicitèt que lo PIB aguèsse davalat solament d’un 2,1% quand a l’exterior s’assolidava que lo país se poiriá escrancar.




abonar los amics de Jornalet

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Sibé Alan
1.

Que parlè sustot deth desvolopament dera societat dera Federacion de Russia, economia, finança, educacion, sociau e solidaritat. Qu'amuishè un exemple de sobiranisme e d'anti-imperialisme atlantista., non-ingeréncia, arrespècte deras civilisacions, prioritat ath Dret internacionau contra era politica deras "règlas" ... De putsar ensenhaments entà nosauts, qu'ei vadut un mond navèth. .

  • 2
  • 0

Escriu un comentari sus aqueste article