Bandièra01 capçalera  1180x150: Novestivada

Actualitats

La Cort Penala Internacionala a emés un mandat d’arrèst contra Vladimir Putin

Li atribuís de crimes de guèrra e de deportacions illegalas d’enfants

Tèxte legit

La Cort Penala Internacionala (CPI) de l’Aia a emés un mandat d’arrèst contra Vladimir Putin pel mandament en Russia d’enfants sortidas de zònas ocupadas d’Ucraïna. L’acusa de crimes de guèrra, de transferiments e de deportacions illegalas d’enfants. A mai, a tanplan ordenat l’arrestacion de Maria Alekseievna Lvova-Belova, comissària dels dreches dels enfants a l’ofici del president de Russia, en tot li atribuir los meteisses delictes.
 
“La lei internacionala enebís que las autoritats ocupantas transpòrten de civils del territòri ont demòran devèrs d’autres endreches. Los enfants son especialament protegits per la Convencion de Genèva”, çò ramenta lo president de la Cort Penala Internacionala, Piotr Hofmański, qu’apond que lo trabalh dels jutges es d’emetre los mandats d’arrèst mas que l’execucion depend de la collaboracion internacionala.
 
Se Putin es pas detengut e liurat a la Cort Penala Internacionala, poirà pas èsser jutjat, pr’amor que la CPI jutja pas in absentia. A mai, en 2016, Russia quitèt l’Estatut de Roma, lo fondament juridic sul qual trabalha la CPI, e Russia a pas idèa de liurar cap d’autoritat a la cort de l’Aia, coma o a ja dich mai d’un còp.
 
Segon lo govèrn d’Ucraïna, dempuèi que comencèt la guèrra aperaquí 16 000 mainats son estats menats en Russia contra lor volontat. Segon un estudi de l'Universitat Yale publicat en febrièr, almens 6000 enfants ucraïneses vivon dins una quarantena d’internats russes.
 
 
Relacions russochinesas
 
D’autre caire, lo president chinés, Xi Jinping, rescontrarà la setmana que ven Vladimir Putin a Moscòu ont es previst que i demòre de diluns a divendres. Los dos caps d’estat an anonciat que signarián una declaracion sus la “nòva èra” de las relacions russochinesas.  L’anóncia arriba un mes après que China presentèt un plan de patz pel conflicte.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article