Bandièra01 capçalera  1180x150: Novestivada

Actualitats

Medvedev menaça de mandar de missils sus la CPI pel mandat d’arrèst de Putin

Lo vicepresident del Conselh rus de la Seguretat a reagit amb colèra e menaças al mandat d’arrèst emés divendres

Tèxte legit

Dmitri Medvedev, èx-president de Russia e actual vicepresident del Conselh rus de la  Seguretat, a reagit amb colèra e menaças al mandat d’arrèst contra Vladimir Putin que l’emetèt divendres la Cort Penala Internacionala (CPI). Dins un messatge tot plen d’insultes dins son canal de Telegram, parla de “mèrda de CPI, inutila” e acusa las Nacions Unidas e d’autras institucions internacionalas d'èsser parcialas.
 
Dins son tèxt, Medvedev critica l’inaccion del tribunal de l’Aia davant “los crimes dels Estats Units en Afganistan e Iraq”. “Lo tribunal se caguèt dessús e poguèt pas res far”, çò ditz. Per el, lo fach d’emetre ara un mandat d’arrèst contra Putin aurà “de consequéncias mostrosas pel drech internacional”, perque, a son vejaire, aquò manca “als fondaments e principis del drech”.
 
En fin, menaça de bombardar la CPI: “Qui que siá  pòt ben imaginar cossí se lança sul Tribunal de l’Aia un missil Onix  ipersonic d’un vaissèl rus sus la mar del Nòrd. Se pòt pas abatre, per malastre. E lo tribunal es solament una organizacion internacionala miserabla, non pas la populacion d’un país de l’OTAN. Per tant, començariá pas una guèrra. An paur. E degun o planherà pas. Alavetz, jutges, agachatz atentivament lo cèl…”.
 
 
Russia dobrís una enquista contra la CPI
 
Mentretant, las autoritats russas an dobèrt una enquista contra lo procuraire de la CPI e contra los jutges Tomoko Akane, Rosario Salvatore Aitala e Sergio Gerardo Ugalde Godinez per persecucion illegala e manca d’imparcialitat.
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
1.

Que los Americanasses foguèssen estats criminals pendent lors guèrras recentas o mai ancianas ten del truïsme. Tot parièr pels Russes. Que de caps d'estats americans ajan las mans lordas non innocentarà pas Putin dels crimes que ne l'acusan se los a efectivament comeses. Lo problèma de la parcialitat d'un tribunal en general non càmbia res a l'eventuala culpabilitat d'un colpable potencial… Aqueles arguments son de fadesas, coma tota l'argumentalha dels politicians en general.

Que los Americans (los decideires al mens) sián TANBEN de rasclanhas, los Ameridians e los Africans exiliats de fòrça per servir d'esclaus non an esperat Medvedev per o saber !

  • 12
  • 0

Escriu un comentari sus aqueste article