Bandièra01 capçalera  1180x150: Novestivada

Actualitats

Baiona: manifestacion per un lotjament digne

N’an pro de las residéncias segondàrias, dels moblats de torisme e tanben dels “efièches nefastes” del mercat

Tèxte legit

Dissabte passat, 1r d’abril, Baiona visquèt una manifestacion pel lotjament e contra la foliá immobilièra. Aperaquí 3500 personas protestèron, malgrat la pluèja, jos la devisa “aski” (pro) per fin de revendicar lo drech a un lotjament digne per totòm, çò rapòrta Mediabask.
 
Dins lo cortègi i aviá la preséncia de mai d'un elegit, dont Jean-René Etchegaray, cònsol màger de Baiona e president de la comunautat d'aglomeracion Bascoat, Alain Iriart, cònsol màger de Sant Pèir d'Irúber, Kotte Ecenarro, cònsol màger d’Hendaia, Daniel Olçomendy, cònsol màger d’ Òstavath-Asme, Iker Elizalde, conselhièr departamental, o Peio Etxeleku, elegit del PNB a Cambon. Après la manifestacion, a partir de 17h, una fèsta populara se tenguèt jols capitèls sus l'esplanada Roland Barthes.
 
Las bandeiròlas revendicavan que se taxèsse los milionaris e non pas los locataris   e que precisament se destinèsse lo lotjament a la gent e non pas a l'argent. N’an pro de las residéncias segondàrias, dels moblats de torisme e tanben dels “efièches nefastes” del mercat. Dempuèi fin 2019, lo prètz del m² a aumentat del 35 % sul territòri, segon la Federacion Nacionala de l'Immobilièr (Fnaim), amb de pics d'8000 a 10 000 èuros dins de vilas coma Biàrritz o Sant Joan de Lus, çò precisa Libération.
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Un Païs, un Pòble
2.

Dins son darrièr ensag "Les Dépossédés", lo geograf Christophe Guilluy mòstra plan cossi la borgesia parisenca (e sos avatars bobos-aparisenquits) s'es apoderada las còstas maritimas e las ciutats del "sud" per ne far de territòris reservats. Endreches que davant la pojada demenciala de l'imobiliar deguda a-n-aquesta colonizacion pels richasses ("gentrification" in v.o.) los estatjants s'i pòdon pas pus logar e son relegats dins un rèire-païs que s'aluencha totjorn de mai en mai. Fa pus de cinquanta ans lo Claude Marti cantava jà cossi lo pòble se trapava a cha pauc desposseït del seu païs per las potèncias d'argent : " Son venguts e nos an pres la tèrra, son venguts amb la fòrça de l'argent ! Son venguts e nos an pres la còsta, son venguts per vendemiar d'argent !"

  • 4
  • 0
Loïson Ispora
1.

Que i èra tanben lo deputat auloronés NUPES de la de la IVau circonscripcion (la bascobearnesa), Iñaki Echaniz.

  • 5
  • 0

Escriu un comentari sus aqueste article