Bandièra01 1180x150: País Invisible

Actualitats

Miquèu Baris filmat per Patric La Vau

Miquèu Baris
Miquèu Baris | PL

Omenatge a Miquèu Baris, dissabte 29 d’abriu, a Dacs. Lo Cafè gascon arcuelh lo realizaire Patric Lavaud dab lo son filme sus un infatigable militant per la lenga occitana.


Dacs: projeccion e omenatge. Rodat en 2022 per Patric Lavaud, lo filme Miquèu Baris suus camins deu Monde serà presentat a Dacs, lo dissabte 29 d’abriu au cinèma multiplèxe Le Grand Club (14h, que valerà mei arribar davant). Bèra iniciativa de l’associacion Cafè gascon[1] qui, atau, renderà omenatge a l’amic Miquèu per 50 ans de vita engatjada au servici de la lenga nòsta. Vadut en 1947 dens lo vilatjòt de Belís, dens una familha de bordilhèrs-arrosinèrs, lo Miquèu Barís qu’a tostemps parlat l’occitan, a nòste lo gascon de las Petitas Lanas, a las termièras deus Baish-Armanhac e de Marsan. Qu’a hicat justament la nòsta cara lenga au còr de las soas accions e de las soas reflexions: ensenhaire, cantaire, condaire, poèta, cercaire, escrivan, militant associatiu, òmi de ràdio, recitaire, o enqüèra gavidaire-devisaire[2].

Patric Lavaud, lo documentarista, que coneish lo Miquèu dempuish mei de quaranta ans e que sap que joguèt un ròtle, quan èra estudiant a Bordèu, dens l’occitanisme de l’epòca. Membre deu Cerc deus Joens Occitans de la vila universitària, se liguèt dab dròlles qui, quauque temps après, s’engatjèren dens l’ensenhament, la cançon o l’accion de terren (Eric Fraj, Bernat Dubarry, hilh de Bigòrra, los peiregòrds Joan Pau Verdier e Michèu Chadeuil, e hòrt d’autes). Lo Miquèu publiquèt lavetz lo sons beròis poèmas (Punts d’interrogacion) dont quauques uns son estats hicats en musica (Los de Nadau de l’epòca, o Coralia Nazabal recentament). E quantas velhadas occitanas animèt, en Gironda, dens las Lanas bien segur, o dens los estagis de formacion! Shens oblidar la soa fidelitat a l’Escòla occitana d’estiu, a Vilanuèva d’Òut, qui hadot e hè enqüèra s’obrir tant de monde a la cultura nòsta dens ua interdialectalitat formadera (qui ne miaça pas lo dialècte gascon, es important, e’m pensi, d’ic precizar). Lo Patric Lavaud hè parlar tanben lo Miquèu sus son libe, Langue d’oïl contre langue d’oc (1978), que Bernat Lasfargas (1924-2018), fondador de Fédérop, gausèt publicar. Tostemps sus l’empont, darrèr un micro o dens ua sala de cors, o ataulat per escríver un conde, arrevirar un tèxte (las soas traduccions de las novèlas d’Emmanuel Delbousquet son supèrbas) o preparar ua cronica, lo Miquèu parla deu son long e sancèr engatjament. Un bèth exemple de seguir!

 

[1] Lo Cafè gascon de Dacs, presidit adara per Jacmes Lesgourgues (06 13 95 47 46), ajudat especiaument per Marie-Jo Lescourret e Joan-Miquèu Cocoynacq, organiza un còp per mes ua conferéncia, ua visita o ua batalèra au torn d’un tèma, tostemps diferent (tradicions, hèstas, lenga, istòria, cantas, literatura, mèdias, etc.).

[2] Suu sit Internet  https://izi.travel/fr, plataforma que permet de descargar un audioguida suus telefonets, lo Miquèu Baris a hèit los comentaris de duas passejadas hòrt interessantas dens lo parçan deu Baish-Ador: l’ua sus la zòna Baiona-Anglet-Biarritz (https://izi.travel/fr/browse/00b08e24-f074-46fd-924f-5bad236a1cac/fr), l’auta suu País de Senhans. Véder: https://www.jornalet.com/nova/12356/passejadas-audioguidadas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Vaugelas Lo Sempoi
1.

formadera

  • 0
  • 2

Escriu un comentari sus aqueste article