Bandièra01 capçalera  1180x150: Novestivada

Actualitats

Turquia: l’HDP denóncia de detencions massissas a tres setmanas de l’eleccion presidenciala

Demest la centena de detenguts, d’avocats, de jornalistas, de directors de campanha e de proprietaris d’estampariás que collabòran amb la campanha electorala

Tèxte legit

Lo Partit Democratic del Pòble (HDP), la principala formacion pròcurda en Turquia, a denonciat “de detencions de massa” a Amed. La formacion acusa lo regim d’Erdoğan de voler manipular los sufragis a pauques jorns de l’eleccion presidenciala que se tendrà lo 14 de mai venent. Segon las darrièras informacions, a l’ora d’ara s’es arrestat 110 personas mas l’HDP prevei que seràn fòrça mai. Demest los detenguts i a d’avocats que poirián susvelhar la seguretat de l’eleccion, de jornalistas independents, de directors de campanha del partit Esquèrra Verda —amb qui l’HDP participa a l’eleccion— e de proprietaris d’estampariás que collabòran amb la campanha electorala.

Segon l’agéncia estatala turca de notícias Anatolia, las detencions arriban dins l’encastre d’una enquista dobèrta pel procuraire provincial contra lo Partit dels Trabalhadors de Curdistan (PKK).

L’organizacion de defensa de las libertats civilas Media and Law Studies Association (MLSA) a indicat sus Twitter que la polícia turca a escorcolhat “d’ostals de jornalistas, d’avocats e de dirigents d’ONG dins fòrça vilas”.

L’èrsa de detencions se produtz tres setmanas abans l’eleccion presidenciala del 14 de mai, dins la quala Erdoğan ensajarà de confirmar son mandat fàcia a Kemal Kılıçdaroğlu, candidat d’unitat dels sièis principals partits opausants.

L’armada turca a intensificat las operacions contra lo PKK —considerat per las autoritats turcas un grop terrorista— tant dins lo sud-èst del país coma al nòrd d’Iraq, totes dos territòris de majoritat curda, dempuèi que se rompèt l’alta al fuòc entre lo govèrn turc e lo grop armat en julhet de 2015. La Cort Constitucionala turca se prononciarà lèu sus l’illegalizacion del partit HDP.

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article