Bandièra01 1180x150: País Invisible

Actualitats

La realizaira Justine Triet empòrta la Palma d’Aur de Canas per Anatomie d’une chute

Al moment de recebre lo guierdon, aprofechèt son discors per criticar la reforma de las retiradas impausada pel govèrn francés

La realizaira Justine Triet empòrta la Palma d’Aur de Canas per <em>Anatomie d’une chute</em>
La realizaira Justine Triet empòrta la Palma d’Aur de Canas per Anatomie d’une chute | Reuters/Eric Gaillard

Lo filme Anatomie d’une chute (Anatomia d’una casuda), de la realizaira normanda Justine Triet, a ganhat la Palma d’Aur de la 75a edicion del Festenal del Cinèma de Canas (Vencenc), anonciada dissabte dins la gala que clavava l’eveniment internacional del seten art. L’actritz Jane Fonda foguèt encargada d’anonciar lo nom del filme ganhaire, un thriller judiciari sul decès d’un òme que tomba del segond estanci de son ostal, dins los Alps arpitans, e sa femna es sospechadad’aquela mort. Amb aquel filme, Triet ven sonque la tresena femna a ganhar la Palma d’Aur long de las 76 edicions del festenal, après Jane Campion e Julia Ducournau.

A l’ora de recebre lo guierdon, Triet profechèt de son discors per criticar la reforma de las retiradas impausada pel govèrn francés. Après los costumièrs mercejaments, esmoguda, la realizaira diguèt: “Avèm viscut un movement de protèsta istoric, extrèmament potent e unanim contra la reforma de las retiradas, qu’es estat negat e reprimit de faiçon chocanta”. Es aital que denoncièt aquel “poder senhorejaire”cada còp “mai descomplexat” que tòca quitament lo cinèma. Dins aquel sens critiquèt las mesuras per protegir e promòure l’art francés; per Triet, “la mercantilizacion de la cultura que lo govèrn neoliberal defend romp amb l’excepcion culturala francesa”.

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article