Bandièra01 capçalera  1180x150: Novestivada

Actualitats

Èrsa d’arrestacions contra lo movement ecologista

Arrestèron diluns una quinzena d’activistas a Marselha, Tolosa, Baiona, dins doas comunas ruralas del causse de Cailutz e tanben a Lion, Dijon e Montreuil

En decembre passat, 200 militants envasiguèron una usina Lafarge e menèron una sèria de sabotatges
En decembre passat, 200 militants envasiguèron una usina Lafarge e menèron una sèria de sabotatges | @lessoulevements

Tèxte legit

Arrestèron diluns passat a 6h una quinzena de militants ecologistas a Marselha, Tolosa, Baiona, dins doas comunas ruralas del causse de Cailutz (Cailutz e Vurdfuèlh) e tanben fòra d’Occitània dont Lion, Dijon e Montreuil. Plaçats en gàrdia a vista dins diferents comissariats del país e de la rèsta de l’estat, lor an dobèrt una enquista per associacion de malfactors e degradacions en banda organizada, çò rapòrta Reporterre.

Dins lo causse de Cailutz almens una setantena d’agents se son mobilizats en talhant la ciculacion de las estradas. Segon diferents testimònis presents pendent las perquisicions, la BRI (Brigada de recèrca e d'intervencion de la polícia) e la SDAT (Sosdireccion Antiterrorista de la direccion centrala de la polícia judiciària) serián estadas mobilizadas. Doas personas son estadas arrestadas e menadas en garda a vista a Tolosa.

En decembre passat, 200 militants envasiguèron una usina Lafarge e menèron una sèria de sabotatges qu'entraïnèron quatre milions d'èuros de degalhs, segon l'industrial. L'usina èra estada recobèrta de tags. De sacas de ciment foguèron esventradas, lo cremador damatjat, de cables seccionats e d’engenhs de talhièr destruches. Un vidèo difusat per LundiMatin descriviá la mobilizacion.

“Lafarge-Holcim es un dels mai gròsses polluïdors e productors de CO₂ del país”, çò avián explicat los activistas dins un comunicat.

Uèi se prevei d’accions de protèsta davant las usinas de Lafarge e las prefecturas. Los Soslevaments de la Tèrra an cridat a se mobilizar dimenge que ven a Sant-Koulman (Bretanha).

 

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
1.

Pel causse de Cailutz venon de caire las tenèbras ! Dins quin país vevèm, adara ? Los nazis qualificavan ja las femnas e los òmes que resistissián a lor dictatura de "terroristas". Mas qui assaja de semenar la terror e de dissuuadir de tota mena de contestacion ?

  • 7
  • 1

Escriu un comentari sus aqueste article