L’Euroregion Pirenèus-Mediterranèa a aviat una crida a de projèctes culturals d’un montant total de 138 000 èuros, que provenon de la participacion de sos tres membres institucionals: lo govèrn de las illas Balearas, la region Occitània Pirenèus-Mediterranèa e la Generalitat de Catalonha, qu’a l’ora d’ara n’assumís la presidéncia.

Ongan, la convocacion dispausa d’una plataforma en linha que permetrà als actors culturals de mandar lors projèctes de cooperacion dins lors territòris membres. Se seleccionarà las proposicions qu’impulsen la transicion de la cultura devèrs lo domeni numeric, l’usatge de la cultura coma esplech d’inclusion sociala, l’inclusion de las valors dels Objectius de Desvolopament Sostenible (ODS) e del Pache Verd Europèu, la practica e los escambis demest los joves professionals a l’entorn de las lengas e culturas d’aqueles territòris, e tanben d’activitats qu’ajan per tòca lo desvolopament del public jove.

Los projèctes de l’encastre d’aquela crida an de comprene de sòcis de cadun dels tres territòris membres de l’Euroregion: la Region Occitània, Catalonha e las illas Balearas. Lo finançament euroregional maximal autrejat serà del 60% del budget total de cada projècte sostengut, amb un maxim de 25 000 èuros per projècte. Tota l’informacion sus la crida a projèctes, dobèrta fins al 3 de setembre de 2023, se pòt consultar sus aqueste ligam: https://www.euroregio.eu/oc/convocacions-euroregionalas/ajudas-e-subvencions

E per facultar la presentacion de projèctes, aqueste dimècres 14 de junh se tendrà de matin un webinari informatiu, que vos i podètz inscriure amb aqueste ligam. Lo seminari en linha comprendrà un temps de questions e responsas e tanben de contactes entre las entitats interessadas per participar als projèctes.

Cinc projèctes aprovats en 2022

En 2022, foguèron aprovats cinc projèctes, que ja se realizan e contribuisson a la tòca de generar un territòri transfrontalièr partejat resilient e duradís, en metent los ciutadans al còr de lors accions.

L’Euroregion Pirenèus-Mediterranèa es un airal de referéncia dins l’encastre europèu e mediterranèu, en tèrmes de cooperacion dins lo camp cultural, particularament en çò que tanh al sosten al desvolopament de la creacion artistica en totas sas formas e a la promocion de tot son patrimòni. Aquesta crida a de projèctes culturals fa partida del fuèlh de rota de l’entitat transfrontalièra, per fin de bastir un avenir resilient per 2030. Se vòl aital promòure la diversitat culturala dins l’Euroregion, una cultura dobèrta al bacin mediterranèu e solidària amb d’autres territòris.