Bandièra01 capçalera  1180x150: Novestivada

Actualitats

Guèrra en Ucraïna: una mission africana prepausa son plan de patz

Putin saluda l’iniciativa mas Zelenski la considèra coma una “engana” de Russia per ganhar de temps

| @PresidencyZA

Tèxte legit

Una delegacion de sèt caps africans, dirigida pel president de Sudafrica, Cyril Ramaphonsa, s’amassèt dissabte amb lo president de Russia, Vladimir Putin, per tal de prepausar un plan de patz que metèsse lo ponch final a la guèrra en Ucraïna.

Putin saludèt “l’apròchi equilibrat dels amics africans”. De son caire, ça que la, lo president ucraïnés Volodimir Zelenski aviá refusada aquela iniciativa diplomatica que la considèra el coma una “engana” de Russia per ganhar de temps.

Lo plan de patz consistís en dètz ponches que cèrcan de metre fin al conflicte d’un biais pacific. Demanda de començar las negociacions de patz lo pus lèu possible e d’entamenar una desescalada dels dos camps; de garentir la sobeiranetat dels Estats e de lors pòbles confòrmament amb la Carta de l’ÒNU e d’establir de garentidas de seguretat per totes los païses; d’assegurar l’exportacion de cerealas e fertilizants dels dos païses;  de balhar de sosten umanitari a las victimas del conflicte; de resòlver l’escambi de presonièrs e lo retorn dels menors;  de garentir la reconstruccion après la fin del conflicte e de collaborar mai estrechament amb los païses africans.

La reünion se tenguèt a Sant Petersborg, ont aviá luòc la darrièra jornada del XXVIn Fòrum Economic Internacional (SPIÈF). La delegacion africana tenguèt durant la velha una reünion amb las autoritats ucraïnesas a Kiev.

La delegacion africana la compausan lo president de Sudafrica, Cyril Ramaphosa; lo de las Comòras, Azali Assoumani; lo de Senegal, Macky Sall; lo de Zambia, Hakainde Hichilema; lo primièr ministre d’Egipte, Mostafa Madbouly, e tanben los representants especials dels presidents d’Oganda e de la Republica de Còngo, Ruhakana Rugunda e Florent Ntsiba respectivament.

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article