Bandièra01 capçalera  1180x150: Novestivada

Actualitats

La messorga d’Espanha a prepaus de l’oficialitat de catalan dins l’UE

Lo govèrn espanhòl assegurèt qu’en 2004 l’aviá sollicitada mas lo Conselh de l’Union Europèa o desmentís

Tèxte legit

Lo Conselh de l'Union Europèa a desmentit que lo govèrn espanhòl demandèsse en 2004 que lo catalan foguèsse lenga oficiala de l'Union Europèa. O a comunicat aital lo Conselh dins una responsa formala a l’eurodeputat irlandés Chris MacManus —coordenat amb la catalana Plataforma per la Lenga—; aquela responsa soslinha tanben que cal pas reformar cap de tractat per qu’una lenga venga oficiala, mas qu’o devon decidir a l’unanimitat los estats membres.

Aquelas doas afirmacions del Conselh contradison las explicas del ministre dels afars estrangièrs espanhòl, José Manuel Albares, qu’a la fin de l’an passat assegurèt que lo govèrn espanhòl aviá demandada l’oficialitat del catalan en 2004, mas que la sollicitacion capitèt mal pr’amor que caliá reformar los tractats de l'UE.

“Lo 13 de decembre de 2004, lo govèrn espanhòl demandèt que se faguèsse una reconeissença oficiala de las autras lengas qu’an estatut oficial en Espanha (catalan, basco e galèc) [mençona pas l’occitan], mas demandèt pas jamai qu'aquelas lengas s’apondèsson a la lista de lengas oficialas de l'UE”, çò ditz la responsa.

Lo president de la Generalitat en exili, e ara eurodeputat Carles Puigdemont, a plangut que se presentèsse l’oficialitat del catalan a l'UE coma un dels acòrdis de la “taula de dialòg” entre Madrid e Barcelona. “Far de tractacions amb de messorguièrs compulsius sens prene cap de sòrta de precaucion es una irresponsabilitat grèva”, çò a dich.

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article