Per lo tot purmèir còp, se debanèt lo 29 de març una jornada escolara bastida sus l’avenidor occitan. Organizat per lo Conselh Generau deus Hauts Pirenèus, tots los collegians de classa de tresau en opcion occitan esturen convidats a passar un dia dens la Monta de Tarba. Au programa: intervencions de professionaus de l’occitan, vistalhada de la monta en occitan, un espectacle de teatre de carrèira apitat per la companhia “Nov’Companhia de paraulas publicas” e una amuishada cavalièra.
Lo departament deus Hauts Pirenèus ten l’especifitat de prepausar l’occitan dens 19 collègis deu parçan. Es quasi la totalitat deus establiments. En tot 1710 eslhèves aprenen l’occitan en Bigòrra.
Per aqueth dia, estó decidit d’organizar una jornada per los liceans de doman per tau de los poder desvelhar a la vita vitanta professionala occitana. Mei de 250 eslhèves èran esperats a la Monta de Tarba (monument istoric màger de la ciutat). Estó lo parat per eths de poder encontrar monde atau com lo profesor d’occitan au licèu, lo cargat de mission, l’elegit delegat de cultura per l’occitan o enquèra un guida de montanha.
Lo tot dens un environament arquitecturau especiau e emblematic deu parçan: lo deus chivaus. La conferéncia se debanèt, seguida d'una vistalhada comentada en occitan. Aquesta estó perpausada per tau de har poder descobrir los mistèris e las maquinas de las montas nacionaus. Lo dia s’acabèt dab un espectacle de teatre de carrèira en occitan e una presentacion cavalièra pro agradiua en aqueth dia de sorelh leugèr de prima. En esperar que lo vam de la jornada dèishe de las idèias e deus sauneis dens lo cap de las navèras generacions.
Lucia Rolet
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari