Bandièra01 1180x150: País Invisible

Actualitats

crotz-tolosaCreated with Sketch.GasconhaVal d'AranQuate Lòcs

Pòble Viu: cronica d’un expausant màger dera cultura populara

Der 11 ath 13 d’agost, Bausen acuelhec era prumèra edicion d’un hestivau excepcionau

Pòble Viu: cronica d’un expausant màger dera cultura populara
Pòble Viu: cronica d’un expausant màger dera cultura populara

Tèxte legit

Era dimenjada passada, der 11 ath 13 d’agost, eth petit pòble aranés de Bausen devenguec era scèna d’un hestivau extraordinari nomentat “Pòble Viu”, a on era cultura populara se manifestèc damb tota era sua esplendor. Eth nòm deth hestivau non poderie èster mès adequat, pr’amor que tot un pòble de 65 abitants se mobilizèc entà organizar er eveniment e acuélher damb entosiasme as participaires enes sues cases particulares.

Era atmosfèra vibranta deth hestivau ère palpabla. Es carrèrs èren plens dera energia des abitants, qu’auien organizat es actes e un servici de restauracion entàs assistents.  Quitament bastiren un bar damb paletes de husta, ua collaboracion que joeni e grani i partejauen creativitat.

Eth programa deth hestivau ère largament diuèrs e esmovent. Se destacaue ua pèça de teatre excepcionau que se representèc en un lòc tanplan excepcionau e beròi: eth cementèri de Teresa, protagonista dera istòria d’amor mès celèbra d’Aran.

I auec tanplan collòquis des movements alternatius e debats sus tèmes importants dera vida en Pirenèu coma era reintroduccion der os. Es participants escambiaven en occitan, aragonés, catalan e francés en tot demostrar qu’era intercompreneson ei possibla quan se vò.

Un obrador de restauracion deth lauadèr ara manèra tradicionau mantenguèc tanplan viua aquera ancestrau tecnica de construccion.

Es obradors non sigueren solament educatius mès tanben amusants. Es assistents poderen experimentar era magia des “trucassades”—cançons improvisades en occitan—, crear espantaudèths e gaudir d’ua larga gamma d’activitats pensades entà tota era familha. Delà dera mòstra de glòsa catalana, que siguec plan participatiua, s’enteneren fòrça es tradicionaus cantères gascones; aquera tradicion de cants polifonics establic, coma d’abitud, es complicitats entre es cantadors e amassats en Bausen, a on aquera tradicion s’auie ja reviscut enes darrèri ans.

Eth climax deth hestivau arribèc damb eth rescontre d’acordionistes e un balh tradicionau que hec a culminar tres dies de cultura populara hèta e viscuda en comunitat. Ei atau que Bausen a revitalizat era esséncia pròpria dera cultura populara creada e mantenguda peth pòble. Eth hestivau “Pòble Viu” demostrèc qu’era cultura ei mès qu’un espectacle; ei un ligam, un rebrembe viu e actuau des arraïtzes e ua celebracion dera creativitat umana.

 

 

 

 Ferriòl Macip

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article