Bandièra01 capçalera  1180x150: Novestivada

Actualitats

Ais de Provença aculhirà dissabte un omenatge a Bernat Molin

Lo matematician e lingüista provençal nos quitèt en març de 2020 en daissant de preciosas publicacions qu’ajudan a ensenhar e preservar l’occitan

Tèxte legit

Dissabte que ven, 23 de setembre, Ais de Provença aculhirà un omenatge a Bernat Molin, matematician conegut e lingüista especializat en lexicografia e gramaticografia, membre del conselh lingüistic del Congrès Permanent de la Lenga Occitana, que nos quitèt lo 26 de març de 2020 a l'edat de 72 ans.

L’eveniment se tendrà a l’Ostau de Provença, sul pargue Jordan d’Ais, a partir de 14 oras, e comprendrà los parladisses de Miquèu Arnaud, Lauriana Aubèrt, Josiana Ubaud, Joan Claudi Rixte e Domergue Sumien jos la presidéncia de Joèu Boc. Puèi i aurà un espectacle de Liza l’Occitana, la projeccion del filme Un théâtre dans la ville, d’Andrieu Neyton, un concèrt polifonic de Tant que li Siam, e un concèrt e balèti del Duo Montanaro.

Especializat en lexicografia e gramaticografia, Bernat Molin participèt a l’elaboracion d’una gramatica provençala en 1998 e publiquèt en 2006 una autra gramatica sus l’occitan del país d’Aubenàs. Membre del conselh lingüistic del Congrès Permanent de la Lenga Occitana, a daissat de publicacions preciosas qu’ajudan a ensenhar e preservar l’occitan.

Molin partiguèt durant lo temps de confinament entraïnat per la crisi de la covid-19, e per aquela trista rason sas funeralhas foguèron plan frejas. Aqueste omenatge se presenta doncas coma los adieus dignes que merita.

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article