Bandièra01 1180x150: País Invisible

Actualitats

Peireguers: granda jornada de cinèma en occitan

D’escolans, collegians e liceans assistiràn a de projeccions en occitan, e dins la serada, los cinèmas CGR projectaràn lo Cirano de Rappeneau en occitan

Peireguers: granda jornada de cinèma en occitan
Peireguers: granda jornada de cinèma en occitan | MasterTux

Tèxte legit

La version en occitan del filme Cirano de Brageirac, del realizaire Jean-Paul Rappeneau, se projectarà divendres que ven, 6 d’octòbre, als cinèmas CGR de Peireguers a 20h. Aquel eveniment es possible gràcias a la collaboracion de l’associacion Novelum amb Cine Cinèma e Conta’m, que ne faguèt lo doblatge en occitan après un trabalh colossal jos la direccion artistica de Laurenç Labadie. Abans la projeccion s’ofrirà un aperitiu al vestibul del cinèma a partir de 19h. Lo filme serà presentat per Jean Michel Hellio, director de Cine Cinèma, e Laurenç Labadie moderarà un debat dins la sala.

Aquel meteis jorn pel matin, los escolans que fan d’occitan a l’escòla auràn assistit a de projeccions de cinèma en occitan:  las classas de mairala agacharàn lo filme d’animacion La Balena e l’escaragòla e los cicles 2 e 3 Lo jorn de las gralhas. En mai d’aquò, de tantòst, los joves de collègis e licèus assistiràn a una sesilha de doblatge realizada dins la sala de cinèma per la còla de Conta’m, seguida de la projeccion del longmetratge Letra a Momò.

Novelum es la seccion peiregòrda de l’Institut d’Estudis Occitans. Amb la collaboracion entamenada amb l’associacion Cine Cinèma, que promòu d’òbras d’art e d’ensag a Peireguers, e Conta’m, materializan aquel projècte de projeccions en lenga occitana pel public escolar, pel jove public e pel public en general.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article