Bandièra01 1180x150: País Invisible

Actualitats

Francis Fourcou desvèla son pont sus l’ocean

Una cantadora occitana rescontra lo pòble osage en Oklahoma, ont descobrís lor lenga, lor istòria tragica e lor necessari mestritge de lor destin

Tèxte legit

Lo realizaire occitan Francis Fourcou es a mand de desvelar son darrièr film entitolat Un pont au-dessus de l’océan, un documentari captivant que promet de seduire un larg public. Lo filme serà difusat dins divèrsas vilas occitanas dont Carcassona, Sant Gaudenç, Montpelhièr, Montalban e Tornafuèlha.

Malgrat lo títol en francés, Un pont au-dessus de l’océan es un longmetratge de 90 minutas en diversas lengas, dont l’occitan, que documenta lo rescontre d’una cantadora occitana amb lo pòble osage en Oklahoma, ont descobrís la lenga renaissenta dels osages, l’istòria tragica d’aquel pòble, la cultura dels indians de las planuras e lo necessari mestritge de lor destin. Puèi, es una poetessa osage que vesita Occitània e descobrís las lenga e cultura nòstras que se baton per subreviure. Es alavetz que trapa l’istòria de 3 osages perduts dos ans en Euròpa qu’arribèron a Montalban en 1829 e la solidaritat dels carcinòls que los ajudèron a tornar en Oklahoma. D’aquel fach naisseriá cent ans pus tard l’associacion Oklahoma-Occitània qu’organiza d’escambis culturals.

 

Martin Scorsese

 

Camin fasent, lo filme rescontra lo cap Standing Bear, Montsegur, la memòria de Wounded Knee, e mai Martin Scorsese, que presenta tanben ara en salas un filme que met en scèna la violéncia absoluda patida pels pòbles originaris de l’America del Nòrd. Lo filme d’Scorsese es entitolat Killers of the Flower Moon, ten de nombroses actors osages e  los famoses Robert De Niro e Leonardo Di Caprio, e arriba als ecrans de l’estat francés en decembre de 2022.

Los osages son un pòble de lenga hoka-sioux. Lor nom, “osage”, ven del biais francés de prononciar wažáže (aigas mejanas). A l’ora d’ara, los osages se dison eles meteisses Ni Okašką, (lo Pòble de las Aigas Mejanas).

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

L'Alan Carcassona
1.

Projeccion del film lo dilmars 31 d'octobre a 20h, al cinèma Colisèu de Carcassona, amb lo concors de l'IEO-Aude e dels Amics del Cinòch, en preséncia de Francis Fourcou e de Chelsea Hicks.

  • 0
  • 0

Escriu un comentari sus aqueste article