Bandièra01 1180x150: País Invisible

Actualitats

crotz-tolosaCreated with Sketch.GasconhaVal d'AranCastièro

Jornada dera Armada ena Val d’Aran: jurament deth drapèu e concèrt militar

Dissabte que ven, es ciutadans aranesi poderàn jurar obediéncia e fidelitat ara pàtria espanhòla

Er eveniment aurà lòc en parcatge 3 de Vielha, a on i auec ua caserna militara entre 1961 e 2000. En 2018, se i placèc aquiu un monument en rebrembe dera brigada que l’aucupaue
Er eveniment aurà lòc en parcatge 3 de Vielha, a on i auec ua caserna militara entre 1961 e 2000. En 2018, se i placèc aquiu un monument en rebrembe dera brigada que l’aucupaue | Vielha e Mijaran

Tèxte legit

Era Val d’Aran aculhirà dissabte que ven, 28 d’octobre, ua jornada consagrada ara armada espanhòla damb un jurament de drapèu civil e un concèrt dera unitat de musica dera inspeccion generau dera armada.

Eth jurament deth drapèu ei un acte solemne a on es participaries prometen obediéncia e fidelitat ath servici dera “pàtria”. Aguesta sòrta de jurament la hèn toti es membres dera armada espanhòla e ei dubèrt ara societat civil e, per tant, tot ciutadan lo pòt hèr. En aguesta ocasion, er acte aurà lòc en parcatge 3 de Vielha, a on i auec ua casèrna militara entre 1961 e 2000. En 2018, se i placèc aquiu un monument en rebrembe dera brigada que l’aucupaue.

De ser, entàs 20h, en santuari de Santa Maria de Mijaran, i aurà un concèrt interpretat pera unitat de musica dera inspeccion generau dera armada. Era entrada ei gratuita e se pòt sollicitar ena maison comuna de Vielha e Miejaran.

Aquera jornada militara en Aran ei organizada peth Ministèri dera Defensa damb eth sosten dera armada espanhòla, deth Conselh Generau d’Aran e dera municipalitat de Vielha.

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Paueth
2.

Non ac permetam!

Quina orror! Quina terror! Liegi damb consternacion era notícia sus er espectacle public de lecada de linçòu previst tà dissabte, que ven a representar, ena practica, sense que ne siguen conscienti, un acte d’autoimmolacion des sòns protagonistes.
Imaginatz-vos quate o ueit persones, s’èm generosi, es darrèrs representants deth nacionauespanholisme, qu’en aqueth acte de veneracion deth sòn linçòu colorit, tanben coneishut coma “estanquèra”, per auer, casuauments, es madeishi colors qu’auien es burèus de tabac abans qu’eth tabac siguesse considerat prejudiciau entara salut, donc aqueres persones, gent de “raça”, dempús de desfilar era ua ath darrèr dera auta, entà lecar eth madeish linçòu sense desinfectar entre lecada e lecada, risquen d’encomanar-se quauqua malautia infecciosa, com eth grip o era covid e d’autes que non sabem... Per aquerò, pes maishantes conseqüéncies que pòt auer entara salut des lecaires e des sòns vesins, per rasons estrictaments sanitàries, aqueth acte non s’aurie de perméter.

  • 9
  • 0
fabre olargues
1.

E pèrque pas nos balhar las datas dels recampaments i amassadas deu front nacional?

  • 7
  • 0

Escriu un comentari sus aqueste article