Bandièra01 1180x150: País Invisible

Actualitats

País de flors, òda a la prima en País Tòi

Le filme del collectiu audiovisual audenc KOVisuel serà difusat gratuitament en linha le 6 de novembre a 19h

Espelit d’un encontre entre l’art cinematografic e la botanica, aqueste filme del realizaire Jacob Redman (Des couacs et des poètes, documentari sus la fanfara de Menerbés; The French Cowboy, le retrait d’un vaquièr de Madrès dins les Pirenèus) es una convidacion a remirar la prima que s’installa dins la vallada del circ de Gavarnia. Un viatge sensible qu’es lo fruch de mai d’una ora passada al començament de 2021 al còr del Pargue dels Pirenèus, amb las coautoras del filme, Ana Sany e Evelyne Thys. Las plantas ocupan les primièrs ròtles e se prèstan a un raconte poetic, per magnificar la beutat de la flòra, la necessitat de lor conservacion e la passion dels botanistas.

La votz de Laetitia Dutech (La Mal Coiffée) pontua le filme, amb una lectura en occitan dels poèmas nascuts d’un trabalh menat amb les escolans de la valada de Lus e Sent Sauvaire (País Tòi). La poesia rescontra la coneissença scientifica: nos incita a un agait novèl sus aquel mond desconegut e vulnerable. Doas annadas après la sortida de residéncia, après mai de trenta projeccions sus las telas e mai d’una projeccion en festenal (elegit melhor cortmetratge al festenal Des à-côtés, melhora fotografia a l’Ecofest 2023 en Romania), la còla del film vòl partejar son filme amb le mai bèl nombre e prepausa le cortmetratge en accès liure en linha.

Rendètz-vos sus kovisuel.com/pais-de-flors o sus YouTube tre le 6 de novembre de 2023 a 19h! Serà alavetz possible d’escambiar en dirècte amb la còla del filme.Per ne profeitar plenament, vos recomandam d’utilizar un casco.

País de Flors es nascut d’una residéncia de territòri portada en 2021 per l’Ostal del Pargue Nacional e la valada de Lus e Sent Sauvaire, en partenariat amb Occitanie Films e le Pargue Nacional dels Pirenèus, e sostenguda per la DRAC Occitània.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article