Bandièra01 1180x150: País Invisible

Actualitats

Crisi umanitària en Sodan: mai de 6 milions de desplaçats en sèt meses

L’OIM fa una crida urgenta a la comunautat internacionala per tractar de la crisi umanitària creissenta

| Mamadou Dian Balde

Tèxte legit

L'Organizacion Internacionala per las Migracions (OIM) a raportat qu'almens 6,3 milions de personas se son desplaçadas en Sodan dempuèi lo començament del conflicte armat dins lo país fa gaireben sèt meses. Demest aqueste total, 4.9 milions son de desplaçats intèrnes. L’estat de Khartom es lo pus afectat, representant lo 67,7% dels cases.

De remembrar que fins al 15 d’abril passat l’armada de Sodan e los paramilitars de las Fòrças de Sosten Rapid (RSF, en anglés) governavan amassa lo país amb un conselh militar abans que s’afrontèsson. Aquel afrontament entre los partisans del president e los del vicepresident rompèt lo procès de transicion civila del país african e la guèrra civila es totjorn que mai inquietanta.

L’OIM a tanben soslinhat que mai d’1,3 milion de personas an passadas las frontièras en cèrca de refugi. Chad a recebut lo 39,5% dels desplaçats, lo Sodan del Sud n’a recebut lo 27,1% e Egipte lo 25%.

Dempuèi lo 15 d'abril d’ongan, lo conflicte s'es espandit de la capitala, Khartom, e sos environs, fins a la region de Darfor. Fa gaire, los combats se son intensificats en aquela region. La situacion en Sodan es critica e l’OIM fa una crida urgenta a la comunautat internacionala per tractar de la crisi umanitària creissenta.

 

 

 

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article