Bandièra01 1180x150: País Invisible

Actualitats

Rugbi de XIII: los Canaris passan per las alas

Vincenç Albèrt (òme de la partida) pren lo trauc abans de servir Morgan Escarré per un ensag dels Canaris
Vincenç Albèrt (òme de la partida) pren lo trauc abans de servir Morgan Escarré per un ensag dels Canaris | @astreizix / CXIII

Tèxte legit

Aqueste dissabte, èra jorn de dèrbi a Carcassona: revenge de la finala passada, partida entre los primièrs dos del campionat, caçolet a miègjorn, solelh, musicas e vam: èra un novèl rendètz-vos entre Carcassona e Limós.

Se pensava de veire un brave afrontament entre los dos paquets, mas Carcassona alarguèt lo jòc e mestregèt la partida, en signant tres ensages dins lo primièr temps (16-4) e n'ajustant dos aprèp la pausa per ganhar 28-8.

A Sant Estève, Albi se mostrèt sens pietat pels Dragonets, despassats e batuts: 10-49.

Dimenge, victòria aisida per Pià fàcia a Avinhon 42-16 e dins la dificultat per Lesinhan a Tolosa (22-20). Es pas a Sent Gaudenç que Vilanòva ganha sa primièra partida de la sason: desfaita 18-22.

La darrièra jornada anar se debanarà los 9 e 10 de decembre. A per abans, lo XIII de França va jogar doas partidas a Nairobi fàcia a Kenya (dissabte 2 e dimars 5 de decembre).

 

XIII-cadieral: los angleses tròp fòrts

 

Las formacions francesa e anglesa se tornavan trapar aqueste dissabte de vèspre al Palais dels Espòrts de Marselha; los angleses avián pas engolit la desfaita de la debuta del mes e dintrèron amb de bravas intencions que los Blaus capitèron pas de contrar. Los angleses ganhan la partida: 34-18 e lo trofèu mes en jòc per aqueles dos rendètz-vos.

 

Dragons: lo calendièr de la sason 2024

 

Los Dragons Catalans coneisson lo calendièr per la sason venenta. Jogaràn las partidas a Brutus los dissabtes en fin de vèspre.

Entamenaràn la competicion a domicili lo dissabte 17 de febrièr amb la recepcion dels Lops de Warrington abans un desplaçament cò de Londres, que monta del Championship, lo divendres 23 de febrièr.

Al mes d’agost, amb 4 desplaçaments, jogaràn pas jol caud solelh catalan: es de segur bon pels organismes, mas benlèu mens per las caissas del clavaire.

La finala de la Cup se jogarà en junh. La Dimenjada Magica se tendrà dins l’estadi de Leeds, lo dissabte 17 e lo dimenge 18 d’agost. L’adversari dels catalans serà, per l’escasença, Hull KR.

27 partidas son de jogar dins la fasa de classament: 13 a domicili, 13 al defòra e la Dimenjada Magica. Los catalans jogaràn 3 cops fàcia a Warrington (2 recepcions a Brutus), a Hull KR (anar, venir e Dimenjada Magica) e a Londres (2 còps en Anglatèrra). Anem: es en 2024, lo dissabte 12 d’octòbre, que los catalans soslevaràn lo trofèu de la competicion!

 

Cambiaments de règlas

 

Per aquela competicion, la Comission de las Règlas de l’RFL decidís:

  • de la possibilitat de demandar de tornar jogar una mesclanha aprèp una fauta de l’adversari en plaça del còp franc,

  • d’aver un 18n jogaire que poirà dintrar se 3 jogaires de la formacion son nafrats,

  • la sancion per una penalitat per un tengut retardat dins los 40 mètres de l’adversari,

  • de portar una atencion particulara als placatges dangeiroses a las cambas.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article