Bandièra01 1180x150: País Invisible

Actualitats

Rugbi XIII: los Pols fan dançar la samba als Simbas

Los Blaus sul terren de Nairobi
Los Blaus sul terren de Nairobi | FFR 13

Un long viatge Tolosa-París-Nairobi per la seleccion francesa per jogar doas partidas fàcia a Kenya, l’esquipa dels Simbas (los Leons, en swahili).

La federacion del país es jove. Sas primièras partidas internacionalas remontan a 10 ans. S’apièjan sus de jogaires venguts del XV e tanben del rugbi de VII, plan present dins los mitans escolars.

Nairobi es mai o mens a l’altitud de Font-romeu. Una sala de manjar per vestiari, un terren traçat per de benevòls, la sonorizacion installada al darrièr moment, la preséncia de l’ambaissador de França, qualques baboïns atirats pel rambalh dins l’assisténcia… Una brava experiéncia pels Pols plan superiors als locals lèu despassats mas plan valents e degalhaires de lors fòrças (3 assucats dins la partida). 42-0 a la pausa pels europèus e 78-6 al final per aqueste primièr rendètz-vos istoric.

Las doas formacions se tornan trapar aqueste dimars 5.

 

Los Dragons a la television

 

La Superliga confirma que totas las partidas de la sason venenta seràn televisadas e beneficiaràn de l’arbitratge vidèo. Un novèl contracte es estat signat amb Sky Sports. A mai, las partidas se poiràn tanben veire sus una plataforma novèla ont caldrà pagar per seguir lo rescontre.

Los Dragons Catalans son en discussion amb la cadena L’Équipeper la difusion de sas partidas sul territòri francés.

 

Championship de 2024

 

Lo Tolosa Olimpic deu esperar lo mes de març per entamenar la competicion de 2024 del Championship. Començaràn la sason novèla lo dissabte 16 de març cò de las Aglas de Sheffield e se desplaçaràn a York lo 31 de març. Caldrà esperar abril per los veire jogar a Ernèst Wallon.

 

Elèit 1: la fin de la fasa anar

 

Aprèp las partidas jogadas aquesta dimenjada e la jornada de la fin de setmana, la fasa anar del campionat serà acabada (levat un Limós-Albi remandat a la prima).

Aqueste dimenge 3, los Dragonets baton St Gaudenç 30-22; Albi se va impausar 50-10 a Tolosa e, un còp de mai, Vilanòva plega fàcia a Avinhon: 14-28.

Aqueste dissabte 9, lo darrièr, Vilanòva, reçauprà lo primièr Carcassona. Se jogarà tanben las partidas amb un cèrt avantatge per las esquipas que recebon: Limós/Tolosa, Avinhon/St Gaudenç, Lesinhan/Dragonets e Albi/Pià.

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

L'Alan Carcassona
1.

E aqueste dimars 5, novèla victòria francesa sus una marca encara mai ampla : 108-4 !

  • 1
  • 0

Escriu un comentari sus aqueste article