En ua energica intervencion en Parlament de Catalonha, era sindica d’Aran, Maria Vergés, evoquèc dijaus passat era situacion d’emergéncia ena Val d’Aran, en tot afirmar qu’era lengua ei en tot morir. Ath delà, reclamèc ua modificacion ena lei electorau qu’assegurèsse era preséncia aumens d’un deputat aranés ena cramba catalana, era creacion d’un modèl de finançament pròpri e era reforma dera Lei de Regim Especiau d’Aran, entre d’autes causes. Ena sua intervencion, era sindica demanèc mès autogovèrn, reclamèc era aplicacion dera Lei de Montanha e que se metesse fin as “grèuges istorics”.

Era responsa deth govèrn dera Generalitat e des grops parlamentaris siguec majoritàriament favorabla as revendicacions dera sindica. Totun, es representants d’Esquèrra Republicana de Catalonha e dera CUP revelèren qu’era manca de capacitat d’òbra deuant es darrères transferéncies a portat ath Conselh Generau d’Aran a comolar de 2021 ençà un restant d’11 milions d’èuros que non an estat investits.