Bandièra01 1180x150: Comuna de Tolosa

Actualitats

Un massacre en Nigèria a fach près de 200 mòrts dins un conflicte fonzièr

De pastres peuls an atacat de vilatges igbos en seguida d’una expansion agricòla exacerbada e de la crisi climatica

Un massacre en Nigèria a fach près de 200 mòrts dins un conflicte fonzièr
Un massacre en Nigèria a fach près de 200 mòrts dins un conflicte fonzièr

Tèxte legit

Almens 198 mòrts e mai d’un milièr de nafrats es lo tragic bilanç del massacre tengut pendent qualques jorns en una vintena de vilatges de l’estat de Plateau, en Nigèria. Los assalhidors, armats d'armas de fuòc e de cotèls, son identificats coma de pastres musulmans peuls, mentre que las victimas son en majoritat d'agricultors crestians igbos.

La region coneis dempuèi longtemps de tensions entre los noiriguièrs peuls del nòrd e los agricultors igbos del sud. Pasmens, l’origina del massacre serián pas los factors etnics, culturals ni religioses mas una concurréncia entre pastres e agricultors dins un conlflicte per las tèrras en seguida d’una expansion agricòla exacerbada e la crisi climatica.

Los enjòcs restacats al clima dins lo nòrd obligan los noiriguièrs peuls a migrar cap al sud, ont una populacion creissenta d'agricultors intensifica la concurréncia per l'accès a las tèrras. La crisi a culminat amb las recentas violéncias, en metent en question la percepcion que lo conflicte seriá causat per de diferéncias etnicas o religiosas.

Amnestia Internacionala a demandat una enquista sus las “falhas de seguretat inexcusablas” qu'an permés que los atacs persistisson mai de 48 oras, en passant d'un vilatge a l'autre. Lo president nigerian Bola Ahmed Tinubu a cridat a la mobilizacion immediata de las ressorsas umanitàrias pels subrevivents e a ordenat a las agéncias de seguretat d'intervenir, d'enquistar e d'arrestar los responsables.

Aqueste darrièr masèl es l'episòdi de violéncia lo mai murtrièr dempuèi 2018 dins aquela region del centre de Nigèria, que ja patís d’autres problèmas de violéncia, sustot amb las agressions del grop criminal Boko Haram.

 

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article