Las competicions de XIII tornan prene aquesta primièra dimenjada de genièr amb la tenguda dels ueitens de la Copa Lòrd Derby. Son al programa las partidas:

• dissabte 6: Entraigas/Limós e Vilagalhenc-Argon/Albi.

• dimenge 7: lo dèrbi Selon-Avinhon, l’Escura-Vilanòva, Illa/Lesinhan, Vilafranca/St Gaudenç e dos afrontaments entre pensionaris de l’Elèit 1: Carcassona-Pià e Tolosa-Dragonets.

Cò dels Dragons

• Coma cada an, en francés, anglés e catalan, los jogaires e l’enquadrament de l’esquipa an enregistrat un vidèo amb los vòts per Nadal e l’an novèl.

• Per refortir la coesion del grop, los jogaires an fait una sesilha de rems tradicionals sus l’estanh de sant Cebrià, una sortida VTT a la torre Madeloc, mas tanben una virada al vilatge de Nadal del Barcarès .

• La tribuna Guasch-Laborde serà destrusida a la fin de la sason de 2024 per daissar plaça a una tribuna mai bèla amb un novèl espaci receptiu.

• Lo club enregistra mai d'un 20% d'abonats per la sason novèla.

• La comission de disciplina a pas gaire presat l’envasiment del terren al còp de fiulet de la mièja finala fàcia a St Helens. E mai aquò se passèsse dins un bon esperit, lo reglament demòra lo reglament: emenda de 12500 liuras pel club (5000 amb relambi) e l’obligacion de presentar un plan de seguretat per evitar lo renovelament. Bon, aquò empacharà pas los catalans de mirar una novèla participacion a la finala!

• Dins una entrevista, lo president Guasch ditz que i a pas de joves catalans prèstes per jogar al nivèl Superliga. Per montar lor nivèl, se caliá suprimir la participacion de la formacion U19 al campionat anglés, e causir de faire venir de jogaires dels antipòdes en fin de carrièra que d’unes an trigossat lors nafraduras o lor incompreneson de l’arbitratge europèu? La question s’amerita d’èsser pausada… e la pausam!

Adieus

Doas legendas del XIII de Catalonha nos venon de quitar.

Lo pilar catalan e ancian internacional, Enric Daniel, moriguèt en aquesta fin de decembre. Dins los ans 1970 e 1980, portèt las colors del XIII Catalan, de Pià e de St Pau de Fenolhet. Fasiá partida de la darrièra esquipa de França que batèt los australians 11-10 a Tolosa en 1978.

Aqueste 31 de decembre, foguèrem assabentats de la despartida de Matieu Khedimi que defendèt bravament las colors de Sant Estève ont ganhèt 4 títols de campion e 4 copas de França, abans de signar un doblat coma entraïnaire. Foguèt lo vicepresident actiu e eficaç de la Federacion pendent lo mandat de Marc Palanques; sos dos filhs, Roman e Matieu, venon de tornar a Sant Estève aprèp aver defendudas las colors de Carcassona.

XIII-cadieral: la Partida de las Originas se jòga en Bretanha

En XIII-cadieral, una oposicion entre una seleccion de l’Èst e una de l’Oèst se tendrà en Bretanha a Saent-Erbelaen, prèp de Nantas, aqueste dissabte 6 de genièr (18h15).

… e la bona annada!

Desiram una bona annada plan esportiva, amb sa carga d’emocions e de jòias, per totas las legeiras e totes los legeires, totas las escotairas e totes los escotaires que seguisson aquesta cronica setmanièra en esperant de vos rescontrar dins las tribunas o a l’estanquet dels estadis ont se jògan las partidas d’aquel espòrt viu, atractiu e dinamic qu’es lo rugbi de XIII!