Bandièra01 capçalera  1180x150: Novestivada

Actualitats

S’augura la guèrra e lo totalitarisme per Russia après la victòria electorala de Putin

La victòria recòrd de Putin a la presidenciala anóncia una intensificacion dels conflictes amb l’Occident, malgrat lo malcontentament creissent dels ciutadans russes

Los candidats a l'eleccion presidenciala de Russia 2024
Los candidats a l'eleccion presidenciala de Russia 2024 | kremlin.ru

Tèxte legit

La recenta victòria de Vladimir Putin a la presidenciala russa a suscitat d’escepticisme sus l’avenidor politic e internacional de Russia. Segon Fanpage, après una eleccion marcada per d’acusacions de frauda e de manipòla, los analistas preveson una escalada cap al totalitarisme e un refortiment de l’agressivitat del regim.

Amb un pretendut sosten de l’87% de la populacion, segon las chifras oficialas, Putin sembla d’aver assolidat son poder. Pasmens, aqueles resultats son remeses en question per fòrça expèrts e cercaires, que senhalan una manipòla flagranta del procès electoral. Segon los estudis, la mitat dels vòtes obtenguts per Putin poirián èsser estats falsificats, metent en lum la fragilitat de la legitimitat de son mandat.

Sul plan internacional, las consequéncias d’aquela victòria son alarmantas. Una intensificacion dels conflictes amb l’Occident e una recrudescéncia de la guèrra en Ucraïna son de preveire. Malgrat que los sondatges indiquen un desir majoritari de patz e de raprochament amb las poténcias occidentalas, la realitat del poder de Putin sembla d’anar dins lo sens contrari.

Los observaires avertisson d’efièch qu’aquela victòria electorala fornirà a Putin una justificacion per afortir son contraròtle intèrne e aumentar las ressorsas consagradas a la maquina de guèrra. Totparièr, se desencadenarà una repression mai ferotja contra tota forma d’oposicion, amb la persecucion de totes los que desfisaràn lo regim.

Malgrat aquel tablèu escur, cèrts expèrts considèran que la victòria de Putin del 17 de març es pas que tactica, en remarcant que las eleccions en Russia rebaton pas totjorn la realitat del país e que lo sosten al regim es manipulat per la paur e la coercicion.

Segon lo politològ petersborgés Ilya Matveev, Putin “a obtengut çò que voliá e es per el una victòria. Mas solament temporària”. Matveev demòra en Califòrnia, ont es cercaire a l’Universitat de Berkeley. Quitèt Russia perque èra contra l’invasion d’Ucraïna. “Las eleccions en Russia, çò apond, son pas diferentas d’aquelas organizadas dins d’autres regims dictatorials. Son coma las eleccions en Siria o dins cèrts païses d’Asia centrala, ont lo candidat causit pòt obténer lo 99 % dels vòtes. E donc miralhan pas necessàriament la realitat del país. O la miralhan pas longtemps. Per exemple: en Tunisia, Ben Ali emportèt lo 90 % dels vòtes a l’eleccion mas, un an mai tard, foguèt fòrabandit del poder per un soslevament popular. Las dictaturas pòdon falsificar las eleccions, mas aquò vòl pas dire qu’en agissent aital s’asseguren lo contraròtle per totjorn.”

Per ansin, demòra de veire coma evoluirà la situacion politica e internacionala de Russia dins las annadas avenidoiras, amb un Putin confirmat al poder e una populacion que sembla d’aspirar al cambiament.

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

ltrobat
3.

#2
Solide. E com at sabem tots, Russia qu'ei ua democracia vertadièra, dab medias libres e la garantia de la libertat d'expression.
E tant qu'i ètz, lo Pair Nadau qu'existeish tanben.

  • 4
  • 3
dominique saint louis
2.

POUTINE a pas triché la désinformation honteuse est de votre côté

  • 10
  • 16
Lachaud
1.

La sola libertat qu'exista es la libertat de pensar diferament de çò que l'òm a aprengut a l'escòla, dins la familha , dins los medias. Pensar per se-mesme es nòstra sola libertat. Aitau l'òm bastit una societat ente las gens devenan autonòmes e an pas besonh de se plejar davant lo rei o lo pape, de chausir entre lo canon religios o lo canon militari.
Dins nòstra modernitat, las valors son inversadas. Aitau Satan pòd renhar. Trobara totjorn daus colhons per lo sostener e déclenchar una guerra. Sufis per aquò de fabricar dos camps que se pluma dins un pais, jugar lo ròle de salvador (salvador de que?), puei impausar una dictatura. Emben l'argent quò es aisat.

  • 4
  • 0

Escriu un comentari sus aqueste article