Dissabte, lo primadièr Carcassona recebiá lo darrièr Vilanòva e ganhava largament 50-28. A St Estève, al punt en aur, un tombat fasiá la diferéncia en favor dels locals fàcia a Lesinhan: 25-24.

Dimenge, Limós confirmava sa tresena plaça mercé a una larga victòria a Tolosa 54-14. Pià obten la quatrena plaça mercé a sa victòria 20-12 fàcia a Albi. Dins una partida sens enjòc, Avinhon va batre Sent Gaudenç: 39-28.

Atal, lo classament plaça Carcassona a la primièra plaça amb Albi coma segond. Los dos clubs son qualificats per las mièjas finalas (l’11 de mai a Albi e lo 12 a Carcassona)

Las partidas de barratge (4 e 5 de mai) opausaràn Limós (3n) e St Estève-XIII Catalan (6n) a l’Agulha, e Pià (4n) e Lesinhan (5n) en tèrra catalana.

Aquesta dimenjada, se jogaràn las mièjas finalas de l’Elèit 2 amb las oposicions entre Vilafranca de Roergue e Carpentràs d’un caire e Vilagalhenc-Argon e Illa d’autre caire.

Cap a la Copa del Mond femenina

Lo XIII de França femenin rescontrava Grècia dins una primièra partida qualificativa per la Copa del Mond de 2026. Sus la pelena de l’estadi de Marmanda, las Blavas dominèron la partida que ganhan 58-0. Partida venenta en Serbia al mes de junh.

Cup: la non-partida dels Dragons

Dins la setmana, s’èra dit del costat de Perpinhan que la Cup èra una competicion importanta e qu’avián l’astre de reçaupre lo quart a domicili amb la venguda d’Huddersfield. Mas, dissabte, la formacion catalana joguèt la partida sens èime amb una defensa transformada en passadoira: tres ensages encaissats dins lo primièr temps e tres de mai dins lo segond per una eliminacion indiscutibla: desfaita 6-34.

De son costat, Hull KR s’impausava dins lo segond temps fàcia a Leigh: 26-14 . Dimenge, se qualifiquèron per las mièjas finalas Wigan, que bat Castleford 60-6, e Warrington, que ganha a Saint Helens: 31-8.

Aqueste dissabte 20, a 18h30, pel compte de la Superliga, los Dragons reçaupràn Hull KR. Cal esperar qu’auràn trapat una novèla motivacion e l’enveja de satisfaire los sostens.

Dimenge, a Carcassona, los Andidragons ganhèron la finala de la Copa de França de XIII-cadieral fàcia al SO-Avinhon: 54-24.

Championship: lo TO en dificultat

La debuta de la sason de Championship correspond pas als espèrs del TO, que pèrd a Bradford 12-19, tresena desfaita en 4 partidas. Reaccion esperada fàcia a Whitehaven aqueste dissabte 20 a Ernèst Wallon.

NRL: la dimenjada dels punts en aur

Aquò arriba pas sovent, mas una partida NRL s’acabèt sens venceire: cap de punt marcat dins las prolongacions. Atal, neozelandeses e Manly se quitèron aqueste dissabte 13 d’abril sus una egalitat 22-22.

Dimenge, se’n calguèt de qualques segondas qu’una autra partida s’acabèsse sens venceire. Canberra èra rejonh sus la còrna per un ensag transformat pels Titans (20-20) e capitava de passar lo tombat de la victòria a 3 segondas de la fin de la prolongacion .

Dijòus, los Polets èran anats ganhar a Newcastle 22-20. Divendres, Melbourne mestrejava los Dògols 16-14 e los Bròncos ganhavan lo dèrbi de Queensland fàcia als Dalfins: 26-14. Dissabte, Parramatta batiá los Vaquièrs: 27-20 e las Làmias anavan batre los Lapinons: 34-22. Dimenge, Sant Jòrdi emportava la victòria cò dels Tigres 24-12.

Las Làmias e Melbourne an pres lo cap del classament alara que los Titans an totjorn pas ganhat una partida.