Benny Wenda, cap de la principala organizacion papó en exili, l’ULMWP, a reclamat que lo Naut Comissariat de las Nacions Unidas pels Dreches Umans vesite la Papoa Occidentala après la sortida de dos vidèos dins los quals un grop d’òmes ne torturan un autre. Aquela demanda, que l’apuèja dempuèi d’ans lo movement independentista papó, a lo sosten de mai de 100 païses, mas Indonesia la refusa.

Dins los vidèos se vei cossí l’òme es introduch dins una barrica plena d’un liquid sagnós. Un vidèo mòstra qu’es batut mai d’un còp. Dins l’autre li fan córrer un cotèl per l’esquina. La victima es insultada e sagna per desparièras parts del còrs. Los tormentaires son vestits en civil, mas n’i a un que pòrta de pantalons de camoflatge que, segon The Guardian, son los meteisses que los emplegats per l’armada indonesiana.

Segon Amnestia Internacionala d’Indonesia, que mençona “de fonts cresiblas”, los borrèls son de militars de l’armada indonesiana en mission dins la zòna de Pancak, en Papoa Occidentala. La victima es un papó que seriá mòrt après las torturas.

L’armada indonesiana a dich que “metrà en examen” los faches.

“Lo vidèo mòstra simplament cossí Indonesia se compòrta cada jorn dins mon país”, çò a dich Wenda de son exili estant a Londres. “La tortura es una practica militara tant estenduda qu’es estada descricha coma una «forma de governança» en Papoa Occidentala”.

Indonesia manten ocupada la Papoa Occidentala dempuèi los ans 1960, contra la volontat del movement papó. Lo conflicte a fach a l’entorn de mièg milion de mòrts, dont la majoritat son de papós.

Aquesta nòva es adaptada de Nationalia amb qui Jornalet ten un acòrdi de cooperacion